NunaMinerals

Akuersissut tunniunneqarpoq suliffeqarfiup matuneqarnissaa aarlerineqarmat

Nunamineralsip matuneqarsinnaanera pissutaalluni Paatusumi atortussanik piiaanissamut akuersissut Greenland Rare Earth Projectsimut tunniunneqarpoq

Nunaminerals
Assi toqqorsivimmit

Namminersorlutik Oqartussanit ilaannakortumik aatsitassarsiorfiup pigineqartup, Nunaminerals A/S-ip, Paatusumi aatsitassarsiornissamut akuersissutaani suleqatiminut, Greenland Rare Earth Projectsimut (Grep-imut) ingerlateqqikkaa Sermitsiaq.AG-mit marlunngormat allaaserineqarpoq.

Akuersissut tunniunneqarpoq Nunamineralsip immikkut ittumik sisamanngorpat ataatsimeersuarnerani suliffeqarfiup matuneqarsinnaanera pissutaalluni.

Nunamineralsimi pisortaaneq, Ole Christiansen, Sermitsiaq.AG-mut oqarpoq.

Suleqatigineqartup millionit arlaqartut atoreerpaat
Aatsitassat apeqqusertariaqartunik taaneqartartunik misissuinermi Greenland Rare Earth Projectsip Paatusumi Nunatta kujataaniittumi aningaasaliisimanera pissutaalluni akuersissut taakkununnga tunniunneqarpoq.

- Suleqatitsinnut Greenland Rare Earth Projectsimut akuersissutit tunniuppagut. Taakkumi misissuinernut 2,5 million koruuninik aningaasartuuteqarput 2014-mi. Aamma Nunamineralsip immikkut ittumik ataatsimeersuarnermi matuneqarnissaa ernumagineqarpoq. Sisamanngorpat ataatsimeersuassaagut, Ole Christiansen oqarpoq.

Greenland Rare Earth Projects Patusumi aningaasanik amerlanerusunik 2015-mi aningaasaliinissaa Nunamineralsip pisortaanerata naatsorsuutigaa. 5 million koruunit misissuinissanut atorneqarnissaat naatsorsuutigineqarpoq. Patusumi aatsitassanut apeqqusertariaqartunut ukiuni pingasuni tulliuttuni 15 millon koruuninik Greenland Rare Earth Projects aningaasartuuteqassasoq ilimagineqarpoq.

Akuersissutilli tunniunneqarnissaat Naalakkersuisunit akuerineqaqqaartussaavoq.

Vagar Nunamineralsimiiginnarallarpoq
Naak Greenland Rare Earth Projects akuersissutinik tunineqartussaagaluartoq, Vagarimi kuultisiorfik Nunamineralsimit ingerlanneqarallassaaq.

- Nunatta kujataani kuultisiornissaq Nunamineralsimit akisussaaffigineqarallassaaq naak Patusumi akuersissutit tunniunneqaraluartut, Kujataani kuultisiorfik Patusumut akuersissuteqaraluarpalluunniit, Ole Christiansen oqarpoq.

Greenland Rare Earth Projects aatsitassanik qaqutigoortunik apeqqusertariaqartunik misissuisartuuvoq. Nunani allani piiarneqartartut soorlu tantal, zirkonium, uran aamma thorium misissoqqissaartarpaat.

Powered by Labrador CMS