Akuerineqartoq: Aqqusinissap sinnera akuerineqarsimavoq
Naalakkersuisut Sisimiuniit Kangerluarsuk Tullermut aqqusernup sananeqarnissaanut ingerlanneqarnissaanullu ASN-imut akuersissut akueraat. Aqqusernup imeqarfiup killeqarfiata iluatigoorsinnaanera akuersissutigineqarsimavoq.
- Nuannaarutigaara Sisimiut aamma Kangerlussuup akornanni aqqusineq sivisuumik kissaatigineqartoq maanna piviusunngorsinnaalermat.
Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Sisimiuniit Kangerluarsuk Tullermut aqqusernup sananeqarnissaanut ingerlanneqarnissaanullu ASN-imut nassuiaat Naalakkersuisunit pingasunngornermi akuersissutigineqareersoq naalakkersuisoq taamatut oqaaseqarpoq. Aaamma aqqusineq Sisimiut imeqarfiata killeqarfiata iluatigoorsinnaasoq immikkut ittumik akuersissutigineqarsimavoq.
Tamanna akuersissutigineqarmat, Sisimiut Kangerlussuullu akornanni aqqusinissap sinnera maanna suliarineqarsinnaanngorpoq.
Avatangiisinut isumannaatsuussasoq
Akuersissut immikkullu ittumik akuersissut Qeqqata Kommunianut sanatitsisuusumut tunniunneqarpoq.
- ASN-imut akuersissut aamma imeqarfiup killeqarfianut immikkut ittumik akuersissut inuussutissarsiutinik ineriartortitsinerup aamma imeqarfitsinnik avatangiisitsinnillu illersuinerup ataatsikkut ingerlanneqarsinnaanerinut assersuutissaalluarput, Kalistat Lund oqarpoq.
ASN-imut akuersissut aamma imeqarfiup killeqarfianut immikkut ittumik akuersissut arlalinnik piumasaqaatitaqarput. Piumasaqaateqarnermi aqqusernup sananeqarnerata ingerlanneqarneratalu avatangiisinut isumannaatsumik ingerlanneqarsinnaanissaat, aammalu Sisimiuni imermik isumalluuteqarfiup mingutsinneqannginnissaa qulakkeerneqassapput.