Oqaatsit pillugit oqallinneq
Akuereqqulluni ilungersorneq
Eqqumiitsuliortuutigaluni ilusilersuisartoq Liss Stenderip kalaaliulluni oqaatsivut iluamik atorsinnaagit nammineq isummersorpoq
- Oqaatsit tamarmik annernarput. Qiajasuumik taaniannga, ippassarmi allaaserisaq atuarakku qiavunga. Qiangaatsiarpunga.
Uani nittartakkami allaaserineqarsimasoq atuareerlugu, eqqumiitsuliortuutigaluni ilusilersuisartoq Liss Stenderi taama allappoq.
- Paasisinnaanngilluinnarpara kalaallit danskisut oqaasillit tamaani tikilluaqqusaanngitsutut misigalutik meerujunnerat, Najaaraq Müller facebookimini taama allappoq. Taanna inuit naapittarfianni kalaallit danskisut oqaasillit oqaatsivut ilinniaqqullugit kaammattuivoq, oqallisigineqangaatsialersimallunilu.
Atuaruk: Facebookimi oqallinneq: Kalaallisut oqaatsivut ilinniarniarsigit
Akuereqqulluni ilungersorneq
Akuereqqulluni ilungersungaatsiarsimalluni, Liss Stenderip oqaluttuaraa. Kalaaliusutut qallunaatulluunniit.
- Meeraaninni Danmarkimut nuunnikuuvugut. Danskit oqaasii piorsarsimasusaallu malillugit peroriartorsimavunga. Oqaatsivut atoqqusaasimanngilakka. Oqaatsivut puiorsimavakka. Danmarkimiinnerma nalaani ilungersorsimaqaanga, Nunatsinnut naartulerama inuusuttuullunga utersimavunga. 'Angerlarusussimavunga, kisiannili oqaatsivut puiorsimavakka taamaakkaluartoq sapinngisara tamaat atorniarsarisarsimallugit.
- Danmarkimi Nunatsinnilu kinaassusera pillugu iluamik akuerineqarnikuunngilanga. Taakkunani 'eqqortuunngitsutut' misigisarsimaqaanga. Nunaqanngitsoq. Ataqqineqartussanngorlunga inunngornikuunngilanga. Pikkorivissuunngilanga. Arlaannaatigulluunnit iluanaartitaanikuunanga.
- Killormorluinnarli. Maanna inissisimaffinga nammineq ilungersuutiginikooqaara. Pitsaanngitsutut inissinneqartarnera pillugu imminut tatigiunnaarnermik misiginartorujussuusinnaavoq, taamaammat sapiinniarsarisarsimaqaanga. Akuerineqarsinnaanerlunga nalornissutigisarsimaqaara. Kisianni misiliisarsimavunga inooqatimmalu imminut pisuuteqqunanga saammarsartarsimavaanga, taanna oqaluttuarpoq.
Pilliutaanngitsoq
Oqallinnermi oqaatsit atorneqartut sunnertissutigisimallugit, Liss Stender oqarpoq.
- Oqaatsivut atorluarsinnaanngilakka. Kalaallisut allalluarsinnaanngilanga. Kisianni nalunngisaqalaarpunga ullulli tamaasa ilikkagaqartarlunga.
- Ilumoorpoq ippassaq meeriuuppunga, kisianni sunnertisimangama qulliikka kuupput. Paatsoorneqassanngilarli qulliikka kuukkaluarpata pilliutaanngilanga. Inuuvunga. Misigittaatsuunngilanga. Pilliutaanangali. Uanga imminut taama isiginngilanga.
- Nunannilu tikilluaqqusaanngitsutut misigisimanarpoq. Allaanngilaq qimaasuulluni. Inuk nunaqanngitsoq kinaassuseqaranilu. Ilaatinneqalernissamut akuereqqusaarneq? Naamik! Uanga imminut ilusilersornikuuvunga allannilli allanngortinneqassanngilaq, Liss Stender oqarpoq.
Nunarsuarmioqataaneq
Nunarput siuariartortariaqartoq, taanna isumaqarpoq.
- Kaammattoqatigiinnikkut, ataatsimoorluni, ingiaqatigiinnikkulli siumut ingerlariaqqinnissaq uanga pitsaanerpaatut isigaara.
- Nunatsinni nunarsuarmioqataaneq aamma atuuppoq - affarmik kalaallit affarmilluunnit qallunaat kisimik pineqanngillat. Allanik akutarpassuaqarpoq, Liss Stender oqarpoq.
Kalaallit nunami allamiunut akutaanerat ersersinniarlugu Liss Stenderi erfalasunik sanasimavoq. Taanna uani takusinnaavat: