Skip to main content

Akiuussutissaq Johnson og Johnson-imeersoq Nunatsinni atorneqassanngilaq

Danmarkimi Peqqissutsimut Aqutsisoqarfik aalajangerpoq akiuussutissaq oqallisaasimaqisoq Danmarkimi atorneqassanngitsoq. Taamaalilluni aamma Kalaallit Nunaanni atorneqarnavianngilaq.

Akiuussutissaq, Johnson & Johnson-imeersoq qaqutigoortorujussuarnik annertuunilli kingunerluuteqartartoq paasineqarpoq. Taamaattumik Danmarkimi Peqqissutsimut Aqutsisoqarfik aalajangerpoq, akiuussutissaq Johnson & Johnson-imeersoq danskit akiuussutissamik kapuinerannut ilaatinneqassanngitsoq. Aamma Kalaallit Nunaanni atorneqassanngilaq, Namminersorlutik Oqartussat tusagassiuutinut taama nalunaaruteqarput.

Akiuussusersuinerni kinguaatoorneq

Tamanna akiuussutissanik kapuinerup qaqugu ingerlanneqarnerata naammassinissaanut sunniuteqartussaasoq, Namminersorlutik oqartussat allapput. Akiuussutissanik tikisitsisarnerup sukkassuserisaa atorlugu Kalaallit Nunaanni inersimasut tamarmik septembarip aallaqqaataa tikitsinnagu tamarmik akiuussusersorneqarnissaat naatsorsuutigineqarpoq. Siunissami suliffeqarfimmit Moderna-mit akiuussutissanik taamaallaat atuisoqarnissaa naatsorsuutigineqarpoq. 

Tasiilami kujataanilu akiuussusersuineq

Tasiilami nunaqarfinnilu akiuussutissamik kappuinerit maajip arfernganiit maajip 14-ata tungaanut ingerlanneqassapput. Akiuussutissamillu kapuisartut allat kujataanut maajip qulinganiit maajip 18-ata tungaanut angalassapput. Tassanilu inuit kapiteqqittussat aammalu apriilip qaammataani siullermeernermi kapitinniaratik aalajangersimasut akiuussutissamik kapitinnissamut neqeroorfigineqassapput.

Nunatta nakorsaanerata oqaasii naapertorlugit Qaqortumi innuttaasut pingasuugaangata marluk akiuussusersorneqarnissaminut akersisarsimapput. Taamaalilluni apriilimi kapitissimanngitsut kapitinnissaminut periarfissinneqassallutik. 

Innuttaasut 18-inik ukiullit utoqqaanerusullu tamarmik akiuussutissamik kapitinnissamut neqeroorfigineqartut akuerseqqullugit kaammattorneqarput. Kisianni naartusut milutsitsisullu maanna akiuussutissamik kapitissanngillat, akiuussutissaq taakkununnga akuerisaanngimmat.

Akiuussutissamik kapitissimasut covid-19-imik napparsimarujussualinnginnissamut pitsaasumik qulakkeeriffigineqartussaapput. Nappaatip tuniluutilernissaa pinngitsoorniarlugu sapinngisamik amerlanerpaat kapitinnissaat pingaaruteqartoq, Namminersorlutik Oqartussat tusagassiuutinut taama nalunaaruteqarput. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER