Akiuussutissamik piumanngitsut ernumatitsipput
Upernavimmi eqqaanilu coronavirusimut akiuussutissamik piumanngitsut Namminersorlutik Oqartussani ernumalersipput. Akiuussutissaliiartornissamut angalanissaq nutaaq aallartinneqarpoq amerlanerit akiuussutissaleqqullugit.
Upernavimmi eqqaanilu akiuussutissalersuinermut soqutiginnittut ikipallaarput. Namminersorlutik Oqartussat tusagassiorfinnut taama nalunaaruteqarput.
- inuit attaveqaqatigiittarfiisigut tusatsiakkat eqqunngitsut peqqutaasimasinnaapput, Namminersorlutik Oqartussat ilisimatitsipput.
Peqqinnissaqarfimmi sulisut sinerissami akiuussutissalersuisut innuttaasunik apeqqusiisunik suli naammattoorsisarput. Ilaatigut tusatsiagaasarlutik inuit attaveqaqatigiittarfiini alussaateeqqat talinut kajungerisillugit assilisat ingerlaartinneqartut kiisalu timi kajungerisoqalertarneranik tusatsiakkat tunngavissaqanngitsut apeqqusiissutaasarlutik.
- Tusatsiakkat eqqunngitsut taakku ammaaqqinnissamut pilersaarutitsinnut, inuiaqatigiillu ataatsimut isigalugit peqqissusaannut, aammalu ajornerpaamik pisoqassappat inunnut annertuunik kingunerlutsitsisinnaapput.
Nunatsinni Covid-19-imik tunillatsissimasut maanna sisamaapput, ataaseq napparsimmavimmut unissimalluni.
Akiuussutissalersuiartorneq nutaaq
Akiuussutissamut soqutiginnittut siullermik amerlasimannginnerat pillugu Upernavik eqqaalu tikinneqaqqittussanngorput, amerlanerusut akiuussutissalernissaat anguniarlugu.
Namminersorlutik Oqartussat kaammattuipput akiuussutissamut neqeroorut tigulluaqqullugu.
- Immitsinnut illersorniarluta akiuussutissamik kapitinnissamut akuersisarpugut–iluaqutissarli annerpaaq tassaavoq qanigisagut asasavullu illersortussaagatsigit, kaammattuutigineqarpoq.
Upernavimmi eqqaanilu pilersaarut:
11. juni Innaarsuit
12. juni Upernavik
12. juni Naajaat
12. juni Aappilattoq
13. juni Kangersuatsiaq
13. juni Upernavik Kujalleq