Akiuussutissamik kapuuineq kinguaattoorpoq

Danmarkimisussaaq Kalaallit Nunaanni akiuussutissamik kapuuineq kinguaattuussaaq. Maanna naatsorsuutigineqalerpoq kikkut tamarmik aggustimi covid-19-imut akiuussutissamik kapitinnissamut neqeroorfigineqarsimassasut. Naammagittartariaqarpugut, nakorsaaneq oqarpoq.

Peqqinnissamut oqartussaasut manna tikillugu akiuussutissq Pfizer/BioNTech-imeersoq atorlugu kapuuisimapput, maannali akiuussutissaq Moderna-meersoq atorneqalerpoq, taannalu aamma akiuussutissaq mRNA-tut taaneqartarpoq.

Kalaallit Nunaata qallunaat inasssuteqaatai malippai, akiuussutissallu ataasiukkaarlugit nalilersulissanagit. Taamaattumik akiuussutissaq Astra Zeneca-meersoq aamma Kalaallit Nunaannut tikisinneqassanngilaq. Aamma akiuussutissaq Johnson og Johnson-imeersoq nunatsinnut tikisinneqassanersoq qularnartoqartorujussuuvoq. Taanna Astra Zeneca-tulli qaqutigorujussuaq taqqamik milittoornermik kinguneqartartoq pasineqarpoq.

Aviisi Sermitsiaq taama allappoq.

– Akiuussutissaq Astra Zeneca atorneqarunnaarneqarsimavoq, akiuussutissarlu Johnson og Johnson-imeersoq qanoq pineqassanersoq utaqqisariaqarparput. Akiuussutissat Naalagaaffeqatigiit pissarsiaasa 0,96 procentii Kalaallit Nunaata pisarpaii, taamaattumik Danmarki akiuussutissanik ikinnerusunik pippat tamanna aamma Kalaallit Nunaannut sunniuteqassaaq. Naatsorsuutigaara akiuussutissamut pilersaarutaagaluartumut sanilliullugu qaammatit marluk missaanni kinguaattuussalluta. Maanna naatsorsuutigaarput akiuussutissamik kapuuineq aggustimi naammassiumaarlutigu, nakorsaaneq Henrik L. Hansen oqarpoq.

Akiuussutissat Astra Zeneca-meersut Johnson og Johnson-imeersullu qaqutigoortorujussuarmik taqqamik milittoornermik, aannernik blodpladillu ikittuararsuanngornerannik kinguneqartartut, nuannermit virusimit nalinginnaasumit naleqqussarlugu ineriartortinneqarsimavoq, adenovirus-imik taaneqartumik, taannalu corona-virusimut assingusunngorlugu allanngortinneqarsimavoq. Akiuussutissaq timip nappaammut akiuussutissaani covid-19-imut antistoffinik pilersitsisarpoq, pisunili qaqutigoortorujussuarni – 40.000-iugaangata ataasiarluni – timip nappaammut akiuussutissaa corona-virusimut antistoffinik pilersitsiinnarani aamma blodpladinut, trombocytter-inik taaneqartartunut, antistoffinik pilersitsisarpoq, taamaasillunilu taqqani aak tigguttarpoq inuunermullu ulorianartumik taqqamik milittoornermik aannermillu kinguneqarsinnaalluni.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS