Akiuussutissamik kapitissimasut tikinnermi suli mattusimasassapput
Inuit akiuussutissamik kapitissimasut coronavirusimik tunillasssuisinnaanersut suli qulakkeerneqanngilaq. Taamaammat inuit akiuussutissamik kapitissimasulluunniit nunatsinnut tikinnerminni suli mattusimaqqaartassapput.
Inuit coronavirusimut akiuussutissamik kapitereersimasut nunatsinnut tikinnerminni suli angerlarsimaannarnissamik maleruaqqusanik malinnittussaapput, akiuussutissamik kapitissimasut virusimik tunillaasinnaanerannut paasissutissat naammattut suli pigineqanngimmata. Nunatta nakorsaanera Henrik L. Hansen Sermitsiaq.AG-mut ilisimatitsivoq.
- Akiuussutissaq virusimik tunillatsissimanermi perululluni napparsimalernissamut akiuussutissaavoq. Aamma ilisimanngilarput akiuussutissamik kapitissimasut tunillatsissimanerminni ersiuteqaratik tunillaassuisinnaanersut. Taamaammat akiuussutissamik kapitissimasut aamma nunatsinnut tikinnerminni ulluni tallimani angerlarsimaannarnissamut malinnittussaapput, Henrik L. Hansen oqaluttuarpoq.
Sermitsiaq.AG akiuussutissamik kapitereersimasunik nunatsinnulli tikinnermi angerlarsimaannarallaqqaartussaanermik paasiuminaatsitsisunit saaffigineqartarsimavoq.
Nunat tamalaat maleruagaat malinneqarput
Nunatta nakorsaanerata nassuiarpaa akiuussutissalertissimasup akiuussutissalertissimanngitsullu akornanni virusip tunillaassuussinnaanera pillugu nunatsinni misissuinissamut naammattumik tunngavissaqanngitsoq. Naalagaaffiit Peqatigiit peqqinnissaq pillugu suleqatigiiffiata virusimut killilersuutit innersuussutai nunatta malikkallarpai.
Israelimi misissuinermi annertuumi paasineqarsimavoq Pfizer/BioNTech tunillaanermut napparsimallunilu perulunnissamut akiuussutissaalluartoq.
Angerlarsimaannarnissamut peqqussutit allanngortinnissaat nunatsinni siusinnerusukkut misissorneqarsimasut, nakorsaaneq oqaluttuarpoq. Allannguutissanulli pilersaarutit suli inissinneqanngillat.
- Sammisami paasissutissat nutaat piniarlugit nunat tamalaat akornanni misissuisoqaannavippoq. Nunat tamalaani oqartussat naliliippata akiuussutissalertissimasut tunillaanissamut ilimanaataat annikillisartoq, tikinnermi periarfissat allanngortinnissaat taava nalilersoqqikkumaarpagut, oqarpoq.