Akiuussutissamik allannguineq kinguaattoortitsingaatsiassaaq
Akiuussutissaq Pfizer/BioNTech assartoruminaatsuuvoq, sineriammilu peqqinnissaqarfimmi sulisut taassuminnga atuinissamut ilinniarsimanngillat, Nunatsinni Nakorsaaneq Henrik L. Hansen inuusuttut akiuussutissamik Modernamik akiuussutissalersorneqaannarnissaannik naatsorsuuteqartoq oqaluttuarpoq.
Sapaatip akunnerani matumani meeqqat 18-it inorlugit ukiullit Modernamik akiuussutissalersorneqarnerat unitsikkallarneqarpoq. Tamanna pivoq norskit misissuisimaneranni paasisat tamanut saqqummiunneqarisa kingornatigut mianersornissamik tunngaveqarneq pissutigalugu.
Nunatsinni Nakorsaanerup Henrik L. Hansenip Sermitisaq.AG-mut allakkatigut akissuteqarluni ilisimatitsissutigaa, akiuussutissalersuinerup qanittukkut aallarteqqinneqarnissaa naatsorsuutigalugu aamma sapaatip akunnerata matuma naanerani inaarutaasumik aalajangiisoqarumaartoq naatsorsuutigalugu:
- Naatsorsuutigilluinnarpara meeqqat inuusuttullu Modernamik akiuussutissalersorneqarnerat suli qularnaatsuusoq pillugu isummerumaarluta. Kalaallit Nunaanni Danmarkimiillu kisitsisitigut paasissutissani takussutissaqanngilaq, Modernavik akiuussutissalertinnermi saniatigut ulorianarsinnaasunik sunniuteqarsinnaanersoq, nunatsinni nakorsaaneq oqarpoq .
Norgemi misissuisimanerup takutippaa uumatikkut aseruuttoortoqaratarsinnaasoq. Tassunga atatillugu nunatsinni nakorsaanerup oqaluttuaraa, nunami maani inuusuttut 3000-it Modernamik maannamuugallartoq akiuussutissalerneqarsimasut, uummatikkullu aseruuttortoqarsimaneranik takusaqartoqarsimanngitsoq.
Nunatsinnili nakorsaanerup oqaatigaa akiuussutissaq qularnaatsuusoq, oqaluttuaraalu akiuussutissaq allamik taarserneqassappat akiuussutissalersuinermi kinguaattoortoqassasoq:
- Kinguaattoortoqangaatsiassasoq
- Danmarkimi Peqqinnissamut Aqutsisoqarfiup mianersornissaq tunngavialugu Modernap atorneqannginnissaa aalajangersimavaa, Danmarkimili Pfizer-BioNTech-imik akiuussutissalersuinissamut periarfissagissaartoqarneruvoq. Tassa Danmarkimi aalajangersimaneq kinguneqaateqanngilaq. Nunami maani akiuussutissamik taarsiineq akiuussutissalersuinermut kinguaattoortitsingaatsiassaaq.
- Moderna assersuutigalugu Pfizer/BioNTech-imik taarserneqarpat suut unammilligassaassappat?
- Pfizer/BioNTech assartoruminaatsuuvoq, sineriammilu peqqinnissaqarfimmi sulisut Pfizer/BioNTech-imik atuinissamut ilinniarsimanngillat. Taamaammat taarsiisoqassappat isumalluutinik atuisoqangaatsiartoqassaaq, tamatumalu malitsigisaanik Pfizer/BioNTech-imik atuisoqalerpat akiuussutissalersuinermi kinguaattoortoqangaatsiassalluni, Nunatsinni Nakorsaaneq allappoq, nangillunilu:
- Soorunami inuusuttut 18-it inorlugit ukiullit akiuussutissalersorneqarnerisa kinguaattoorfiunissaat nuannarinngilara, isumaqarpungali unikaallalluta nalilersuilluarnissarput pisariaqartoq. Akiuussutissaq tatigiinnassagutsigu taamaaliortariaqarpugut.
- Modernamik akiuussutissalersuineq ingerlatiinnarneqassasoq aalajangerneqassappat, angajoqqaanut uumatikkut aseruuttoortoqarsinnaaneranik pasitsaassisimanermut ernumassuteqartunut qanoq oqaasissaqarpit?
- Qaqutigupilussuaq saniatigut sunniutaasartoq pineqarpoq, taannalu ilungersunartumik napparsimatitsilertaranilu kingunerlutsitsineq ajorpoq. Kalaallit Nunaanni inuusuttut 3000-inik amerlanerusut taassuminnga akiuussutissalerneqarsimapput, ataasiinnarlu kingunerlutsitsisoq misigisimavarput. Assersuusiussagaanni innuttaasut 1,1 procentii Coronamik tunillatsissimapput, taamaammat akiuussutissalerneqarneq qularnaannerpaavoq, Nunatsinni Nakorsaaneq allappoq.