Akiuussutissalertissimanermut uppernarsaat: Aaqqiissutissaq Nunatsinni atuutsinneqangajalersoq

Danskit akiuussutissalertissimanermut uppernarsaasersuisarnerannut Nunatsinni innuttaasut ilanngunneqarnissaat ulapputigalugu sulissutigineqarpoq, uppernarsaat atorlugu nunarsuarmi akornuteqarani angalasoqarsinnaalissaaq.

Danmarkimi naalakkersuisut akiuussutissalertissimanermut uppernarsaammik passimik suliaqarlutik aallartissimapput, Danmarkimilu digitalieringsstyrelsip Sermitsiaq.AG-mut ilisimatitsissutigaa, Kalaallit Nunaanni innuttaasut tamakkiisumik akiuussutissalertissimasut pillugit paasissutissanut piumasaqaatit ullualuit matuma siornatigut nassiunneqarsimasut, tassa Danmarkimi aaqqiissutaaniartoq Kalaallit Nunaata iluaqutiginiassammagu.

Suleqatigiissitassat toqqarneqarsimasut

Kalaallit Nunaanni Digitaliseeriinermut Aqutsisoqarfimmi pisortap Katrine Hjelholt Nathanielsenip Sermitsiaq.AG-mut ilisimatitsissutigaa, Danmarkimit piumasaqaatinik misissuisussat sisamanngormat ataatsimiissimasut.

- Suleqatigiissitat Peqqinnissaqarfimmit Digitaliseeriinermullu Aqutsisoqarfimmit inuttaqartinneqarput, taakkulu Danmarkimi akiuussutissalertissimanermut uppernarsaammut passimut qanoq ilaatinneqarsinnaanerput nalilersorniarlugu sapaatip akunnerani matumani kingusinnerusukkut ataatsimeeqqinniarput, Katrine Hjelholt Nathanielsen ilisimatitsivoq.

Suleqatigiissitat ataasinngorpat Danmarkimi digitaliseringsstyrelsimik ataatsimeeqateqassapput.

Atortorissaarutit assigiissaakkat

- Paasissutissaativut assigiissaarneqarsimapput, taamaammat suliassat ajornarnavianngillat, naak paasissutissat Danmarkimi atortorineqartumut tunniunneqarnissaannut it-mut atortut immikkut ilaneqarnissaannik tamanna pisariaqaartitsissangaluartoq. Suleqatigiissitat suliaqarnerannit tamanna paasisaqarfiginerussavarput, aqutsisoqarfimmi pisortaq ilisimatitsivoq.

Kalaallit Nunaanni Sulisitsisut pisortaata Christian Keldsenip Kalaallit Nunaanni innuttaasut akiuussutissalertissimanermut uppernarsaateqalernissaat qilanaaraa.

- Qularutigineqassanngilaq ilaasortatta suliffeqarfiutitik isumaginiarlugit nunanut allanut killeqanngitsumik angalasarnissartik pisariaqartimmassuk, Sulisitsisut pisortaat siusinnerusukkut taamatut Sermitsiaq.AG-mut oqarsimavoq.

Powered by Labrador CMS