Akiuussutissalertinnissamut misissortinnissamullu malittarisassat nutaat saqqummiunneqartut

Unnuap-qeqqaniit malittarisassat arlallit atuutsinneqalerput, ilaatigut assersuutigalugu neriniartarfiliarluniluunniit imerniartarfiliarniaraanni tamakkiisumik akiuussutissalertissimanermut coronamilluunniit tunillatsissimannginnermut uppernarsaammik takutitsisarnissaq piumasaqaataalerluni. Pisiniarfiit inuussutissanik nioqquteqartartut malittarisassanut ilaatinneqanngillat.

Namminersorlutik Oqartussat tallimanngormat unnukkut malittarisassat nutaat pillugit ilitsersuut tusagassiorfinnut nalunaarutigalugit nassiuppaat. Malittarisassat nalunaarutini marlunni allassimasut tamaasa uani atuarsinnaavatit.

Nalunaarummi siullermi inuit ininut sumiiffinnullu tamanit iserfigineqarsinnaasunut isernissaannut coronamut akiuussutissamik kapissimanissamut piumasaqaat atulersinneqarpoq. Taanna nuna tamakkerlugu atuutissaaq.

Killilersuutit Upernavimmi Aasiannilu atuutiinnassasut

Nalunaarutip aappaani Upernavimmi Aasiannilu, kiisalu taakku nunaqarfiini killilersuinerit maanna atuuttut ingerlateqqinneqarput.

- Taamaattumik sumiiffinni taakkunani suli qanermut assiaqusersimanissaq, inuit katsersuussinnaasut 20-nut killilerneqarneri kiisalu sumiiffinniit aallarnissamut akiuussutissanik kapuinermi naammassinnissimanissaq suli piumasaqaatigineqarpoq, Namminersorlutik Oqartussat allapput.

Coronap nuna tamakkerlugu ineriartornera malillugu Naalakkersuisut nalunaarummi matumani sumiiffiit taaneqartut ilasinnaavaat.

Akiuussutissamik kapitissimanissamut piumasaqaat pillugu maleruagassat sumi atuutissappat?

COVID-19-imut akiuussutissanik kapuinermi naammassinnissimanngikkuit, imaluunniit nal. ak. 48-t iluani tunillatsissimannginnermik uppernarsaaviusumik misissortissimanngikkuit arfininngorneq aallarnerfigalugu sumiiffinnut tamanit orninneqartartunut arlalinnut iseqqusaanngilatit.

• Neriniartarfiit, kaffisorniartarfiit, imerniartarfiit, diskotekit assigisaallu, silamilu nunaminertani taakkununnga atasut.
• Kulturikkut sullissiviit – taakkununnga ilaatigut kulturip illorsui, filmertarfiit, katersugaasiviit saqqummersitsisarfiillu ilanngullugit.
• Innuttaasut illui assigisaallu.
• Atuakkanik atorniartarfiit.
• Illup iluani silamilu timersortarfiit – taakkununnga ilaatigut init inersuillu timersortarfiit, naluttarfiit, timigissartarfiit arsartarfiillu ilanngullugit.
• Nujalerisut, tagiartuiartut, pinnersaasarfiit assigisaallu.

COVID-19-imut akiuussutissanik kapuinermi naammassinnissimanngikkaluaruilluunniit imaluunniit nal. ak. 48-t iluanni tunillatsissimannginnermik uppernarsaaviusumik misissortissimanngikkaluaruilluunniit sumiiffinnut ukununnga isertoqarsinnaavoq:

• Init nunaminertallu taakkununnga atasut, amerlasuukkaaraluni niuerfittut atorneqartut.
• Allakkerisarfiit.
• Mittarfiit.
• Pisortani oqartussaasuni aamma suliffeqarfinni pilersuiviusuni init sullissiviit, kiffartuussinermi saaffiginnittarfiit il.il.
• Assartuutinut tamanit atorneqartunut utaqqisarfiit.

Malittarisassat nutaat Kalaallit Nunaannut tamarmut atuupput. Kisiannili sumiiffiit pissutsit ilaat nalunaarummut ilaatinneqanngillat:

• Kalaallit Nunaanni Peqqinnissaqarfik nalunaarummut ilaatinneqanngilluinnarpoq, kisiannili tamatigut napparsimasut peqqissusaannik qulakkeeriniarluni namminneerlutik maleruagassiorsinnaapput. Aamma nakorsiartarfiit, suliffiit niuertarfiilluunniit namminersortut, peqqissaasutut akuerisanit ingerlanneqartut atorfigineqartulluunniit ilaatinneqanngillat.
• Politikkikkut katersuunnerit aamma ilaatinneqanngillat, taamatullu politiit sulineri nalunaarummut ilaatinneqaratik.
• Ulluunerani neqeroorutini namminersortunit pisortanilluunniit pigineqartuni, atuarfinni, ilinniarfinni paaqqutarinniffinnilu isersimanermi akiuussutissanik kapuuinermi naammassinnissimanissaq piumasaqaataanngilaq.

Namminersorlutik Oqartussat tamakkua saniatigut apeqqutit uku tusagassiorfinnut nalunaauteqarnermi akissuteqarfigaat:

Kapitissimanissamut piumasaqaat assartuussinermut atuuppa?
Ininut tamanit iserfigineqarsinnaasunut isernissamut killilersuutaagallartut pillugit nalunaarut assartuussinermut atuutinngilaq. Taamaallaat Upernavimmi Aasiannilu, kiisalu taakku nunaqarfiini assartuutinut tamanit atorneqartunut ilaanissamut tamakkiisumik kapitissimanissaq piumasaqaataavoq.

Qanoq ilinerani uppernarsaat atorsinnaaviuk?
Innuttaasut coronapas-imik akiuussutissamilluunniit kapitissimanermut uppernarsaammik nassarnissaat piumasaqaataanngilaq. Politiit peqqinnissaqarfimmut inuit akiuussutissanik kapitissimanerannut paasissutissanik piniarsinnaapput, taamaalillutillu misissuisinnaallutik.
Kapuinermi naammassinnissimanngikkuit covid-19-imik tunillatsissimannginnermut uppernarsaammik takutitsisinnaasussaavutit.

Kikkut inuit tamakkiisumik kapitissimanerannik misissuisinnaappat?
Nalunaarut malinneqarnersoq pillugu misissuinissamut politiit qulakkeerisussaapput. Pisiniarfiutillit, sassaallertarfinni sulisut il.il. misissuinissamut pisussaaffilerneqanngillat. Nalunaarummi maleruagassanik unioqqutitsineq inatsisinik unioqqutitsineruvoq.

Taavami Sullissivik aqqutigalugu akiuussutissanik kapitissimanermut uppernarsaatinik suli utaqqisut?
Misissuisoqarnerani innuttaasut politiit kapitissimanermut paasissutissanik peqqinnissaqarfimmut pissarsiniarnissaannut akuersissummik tunisussaavaat, taamaattumillu uppernarsaammik tigummiaqarnissaq pisariaqanngilaq.

Maleruagassanik malinninnginnermi inatsisitigut kingunerisassat suuppat?Pissuseq pineqartoq pineqaatissiiffiussappat akiliisussanngortitsisoqarsinnaavoq. Tamanna Kalaallit Nunaannut tikinnermi angerlarsimasussaatitaanermik unioqqutitsinertut ittuusinnaavoq.