Akiuussutissalersuineq: Tunillatsinnikuusimasut aamma kingunipiloqartitsisinnaapput

Ullumikkutt nunatsinni covid-19-imik tunillatsissimasut 110-upput. Taakkau innuttaasut allat assigalugit akiuussutissalerneqarnissamut kaammattorneqarput. Timiminni akiuussutissaqareeraluarlutik akiuussutissalertinnerminni nualluttutut ippigisaqarsinnaapput.

Inuit coronaqarsimasut Covid-19-imut akiuussutissalerneqarnerminni allatuulli napparsimalersinnaapput.

-Coronaqarsimalluni timikkut tassunga akiuussuttissaqalersimagaluaraanniluunniit kapitinnermi coronaqarsimanngitsut assigalugit nualluttuttut misigispqarsinnaavoq, Paneeraq Noahsen Nunatta Nakorsaaneqarfiani nakorsaq Sermitsiaq,AG-mut.

Paneeraq Noahsenip ilisimatitsissutigaa, timip qanoq sivisutigisumik coronavirusimut qanoq tunillanneqarsinnaanngittarnersoq ilisimaneqanngimmat coronaqarsimasut aamma akiuussutissalerneqarnissaat suli pingaaruteqartoq.

- Tamakkiisumik akiuussutissalerneqarsimagaaanni, timip virusi piffissami sivisunerusumi eqqaamasinnaavaa. Coronaqarsimallunili akiuussutissalerneqaranilu, timip virusi puigupallassavaa, Paneeraq Noahsen oqaluttuarpoq.

Tunillaasinnaaneq annikinnerusoq

Taassuma oqaluttuararaa, amerlanerit talimikkut kapineqarsimanertik malugisaraat allallu kissarneqalersartut. Tamannali uloriananngilaq, tamakkiisumillu akiuussutissalerneqarsimasut, piffissami sivisunerusumi coronamik tunillatsissinnaassanngillat, taanna erseqqissaavoq.

Akiuussutissalerneqarsimagaluarluni suli tunillatsittoqarsinnaavoq. Nunatta Nakorsaaneqarfianit oqaluttuarineqarpoq, nunani tamalaani misissuisoqarsimanerata takutikkaa, tamakkiisumik akiuussutissalerneqarsimasut akiuussutissalerneqarsimanngitsunut sanilliullutik tunillatsinnerminni annikinnerusumik napparsimasutut misigisartut tunillaasinnaanerallu annikinnerusoq.

Akiuussutissalersuinissamut pilersaarutit malinnaaffigikkit.

Powered by Labrador CMS