Akiuussutissalersuineq siulleq ataasinngorpat Nuummi pissaaq

Aqangu ataasinngornermi januaarip sisamaani Kalaallit Nunaanni inuk siulleq Coronamut akiuussutissalerneqassaaq. Tamanna pissaaq Nuummi utoqqaat illuanni, tusagassiortut najuutissapput. Marlunngorpat Ilulissani akiuussutissalersuineq aallartinneqassaaq.

90-inik ukiullip Margaret Keenanip Tuluit Nunaanneersup assinga nunarsuaq tamakkerlugu tusagassiorfitsigut saqqummiunneqarsimavoq. Taanna Tuluit Nunaanni siullersaalluni akiuussutissamik kapineqarsimavoq.

Nunami maani innuttaasoq akiuussutissamik siullersaalluni kapineqartussaq Nuummiittumi utoqqaat illuanni Ippiarsummi najugalik kapineqassaaq.

Ullaakkut qulinut tanneq pingasut utoqqaat illuanni najugalik akiuussutissamik siullersaalluni kapineqassaaq, najugallillu sinneri tulleriiaarlugit kapineqartassallutik. Akiuussutissamik kapineqarniartut tamarmik kapitinnissamut neqeroorfigineqassapput, kapineqassagunillu akuerseqqaartariaqarlutik.

Ataasinngorpat ualikkut Sanami sulisut akiuussutissalersorneqassapput.

Ilulissani innuttaasunik akiuussutissalersuineq marlunngorpat ullaakkut aallartinneqassaaq, tassani utoqqaat illuanni najugallit siulliunneqassallutik.

Nunatsinni nakorsaanerup ilisimatitsissutisaa, inunnut 975-inut akiuussutissat Kalaallit Nunaannut tikiunneqarsimasut amerlanerulaartut, tassa inunnut 1100-nut naammattuusut. Matumanilu akiuussutissat akoorneqarnissaat pineqarpoq, aamma akoorinermi qanoq annertutigisut maagaannartinneqarnersut apeqqutaassalluni.

Inuit siulliullugit akiuussutissalerneqartussat

Aallaqqaammut innuttaasut 75-ileereersimasut siulliullugit akiuussutissalerneqarnissamut neqeroorfigineqassapput. Aaamma utoqqaat illuini najugallit qanorluunniit ukioqaraluartut neqeroorfigineqassapput.

Tulliullugit neqeroorfigineqartussat tassaapput ulorianartorsiornerpaanut tunillaasinnaasut - tassa peqqinnissaqarfimmi sulisut, utoqqaat illuini sulisut, peqqinnissaqarfimmi sulisut immikkut aalajangersimasumik suliallit kiisalu angerlarsimaffimmi ikiortit.

Taakku pereerpata, innuttaasut tunillanneqarnissamut immikkut ulorianartorsiorsinnaasut, tassani 75-it inorlugit ukiullit pineqarlutik. Tassa inuit puammikkut, uummatikimmut sukkornermillu nappaatillit tassani pineqarlutik.

- Inuit ajoqutillit pillugit paasissutissat misissorneqassapput, tamatumalu kingorna attavigineqassallutik. Inuit namminnneerlutik peqqinnissaqarfimmut saaffiginnissanngillat, nunatsinni nakorsaaneq Henrik L. Hansen ilisimatitsivoq.

Akiuussutissaq virusimik imaqanngitsoq

Akiuussutissaq assersuutigalugu Tuberkulosimut akiuussutissamut sanilliullugu ”toqungasuuvoq”, tuberkulosemummi akiuussutissat timip nammineerluni akiuussutissaqalernissaa anguniarlugu nappaatip sananeqaataanik annikitsunnguamik akuneqartarpoq.

Tassa akiuussutissamik kapineqarnermi coronavirusi timimut akuliunneqassanngilaq. Akerlianik napparsimanermi timip akiuussutissaqalertarneranut assigusumik akiuussutissaq sananeqarsimavoq. Marloriarluni akiuussutissamik kapisisoqartassaaq, ullut 21-t qaangiunneranni kapisisoqaqqissalluni.

Nunatsinni nakorsaanerup neriuutigaa, akiuussutissaq Modernameersoq sapaatip akunnerata tulliata aallartinnerani akuerineqassasoq, sapaatillu akunnialuit qaangiunneranni nunatsinnut apuunneqassaso. Tamtuma kingorna nunami tamarmi innuttaasut akiuussutissalersorneqarnerat aallartinneqarsinnaassaaq. Akiuussutissamit Pfizer-BioNtechsimeersumit, ataasinngorpat nunami maani atorneqalersussamit Modernameersoq isumagiuminarnerujussuuvoq.

Illloqarfinni nunaqarfinnilu akiuussutissalersuisoqalerpat, sumiiffinni najugaqartut tamarmik ataatsikkut akiuussutissalersorneqassapput, sumiiffinnimi innuttaasut amerlavallaanngimmata arlaleriarluni akiuussutissalersuinissaq isumaqanngimmat, nunatsinni nakorsaaneq ilisimatitsivoq.

Powered by Labrador CMS