Akiuussutissalersuineq pillugu suliaq: Eqqartuussissuserisup misissuinermini kommuni sakkortuumik isornartorsiorpaa

Eqqartuussissuserisup Kommuneqarfik Sermersuumi borgmesterip Charlotte Ludvigsenip (IA) atorfilittallu pingasut Nuummi akiuussutissalersuisoqarnerani tulleriaattut qaangiinnarlugit akiuussutissalerneqarsimanerat misissorsimavaa.

Eqqartuussissuserisup nalunaarusiamini kommuni sakkortuumik isornartorsiorpa, nalunaarusiaq Sermitsiaq.AG-mit takuneqarsimavoq:

- Kommuni 2021-mi juulip 22-ani akiuussutissalersuisoqarmat pitsaasumik ingerlatsinissamut malittarisassanik malinnissimanngilaq, namminerlu inuttut soqutigisat pissaanermik atornerluinissamik inerteqquteqarnermut naapertuutinngitsumik ilanngunneqarsimallutik, pineqartullu atorfitik sakkugalugit imminnut iluaqusersimallutik, taamalu pitsaasumik ingerlatsinissamut malittarisassat avaqqunneqarsimallutik, misissuinermut inerniliussami allassimavoq.

Sulisoq sioorasaarisimasoq

Eqqartuussissuserisorlu naapertorlugu kommunimi atorflittat ilaat ataaseq sioorasaarisuusimavoq:

- Sulisup ataatsip akiuussutissalerneqarnissamik qinnuiginninnermi assuarnartumik oqaaseqarsimanera misissusoqarneranut tunngaviuvoq, tassani akiuussutissaleqqunermut itigartitsisoqassappat ullormi akiuussutissalersuiffiusumi utaqqillutik tulleriiaattunik nakkutiginninnermik kommunip suleqataanera tunuartinniarlugut sioorasaarisimavoq, inerniliussami ilanngullugu allassimavoq.

Eqqartuussissuserisup misissuinerani inerniliussat marlunngormat kommunalbestyrelsip ataatsimiinnerani matoqqasumik oqaluuserineqarpoq. Sermitsiaq.AG-p paasissutissaatai naapertorlugit kommunimi partiit gruppiisa siulittaasui ulloq manna kingusinnerusukkut isornartorsiumminnik saqqummiissapput.