Akiuussusertereersimasut misissorteqqaaratik Nuummiit aallarsinnaassapput
Nuummiit angalasussat coronamut misissortittarnissaannut piumasaqaatit Naalakkersuisut maanna allanngortippaat. Tamakkiisumik akiuussusertissimasut Nuummiit angalassatillutik tunillatsissimannginnermut uppernarsaammik peqartariaarupput.
Naalakkersuisut partiit siuttui isumasioqatigereerlugit Nuummiit angalasunut piumasaqaatinik allannguipput. Akiuussusertissimasut Nuummiit angalasussat coronamik tunillatsissimannginnermut uppernarsaammik peqartariaarutsinneqarput.
Nuummiit aallarusuttut allat coronamik tunillatsissimannginnermut uppernarsaateqarnissaat suli piumasaqaataassaaq.
- Amerlasuunik tunillatsittoqarnera pissutigalugu misissuineq unamminartorsiorpoq. Tuniluunneq unitsissinnaaniassagatsigu, inuit tunillatsissimasunik qanillisimasut tunillatsissimasinnaanermillu ersiuteqartut siullertut sukkanerusumik pisariinnerusumillu misissorneqarnissaat qulakkeertariaqarparput. Taamaattumik nukiit atukkavut allanngortinnissaannut aalajangersimavugut, peqqissutsimut Naalakkersuisoq Kirsten L. Fencker tusagassiorfinnut nalunaarummi oqaaseqarpoq.
Piumasaqaat aqagumiit atuutilissaaq
Nuummiit angalasunut coronamik tunillatsissimannginnermut, akunnernik 48-nik nutaannginnerunngitsumik, uppernarsaateqarnissaq aqagu sisamanngornermi atuutilissaaq. Naalakkersuisut piumasaqaammik tallimanngormalli nalunaaruteqaqqaarnerannit piumasaqaatip atuutilerfissaa katillugu sapaatip akunneranik kinguartinneqartarsimavoq.
Akiuussusersimasullu maanna misissortittariaarupput, akiuussuserneqarsimasut immikkut ittumik akuerisaanerat atuutsinneqartussanngormat.
- Naalakkersuisut pisut ataavartumik nalilersussavaat. Taamaattumillu isumasioqatigeereernerup kingorna killilersuutit aaqqiivigineqartarsinnaanerat pinngitsoorneqarsinnaanngilaq, Naalakkersuisut tusagassiorfinnut nalunaarummi ilisimatitsipput.