Akiuussusersuneq eqqartuussissuserisut misissussagaat
Eqqartuussissuserisut arlaannaannulluunniit attuumassuseqanngitsumik borgmesterip Charlotte Ludvigsenip akunnerpassuarni utaqqisut qaangiinnarlugit kapitissimanera misissussavaat.
Atorfilittat pingasut borgmesterilu Charlotte Ludvigsen siuttoralugit akiuussusertinnermik suliaq maanna Nuna Advokatinit misissorneqassaaq.
Innuttaasulli suliaq pillugu annertuumik oqallissimasut nalunaarusiami eqqartuussissuseriffimmit suliarineqalereersumi pissutsinik tamakkiisunik paasitinneqarnavianngillat.
AG-mit eqqartuussissuserisut misissuinerminni tunngavissaat paasivarput, allassimavorlu misissuineq kommunimi innuttaasunut saqqummiunneqassanngitsoq kommunalbestyrelsilli matoqqasumik ataatsimiinnerani oqaluuserineqassalluni.
Immikkoortut arfinillit
Misissuisut (Nuna Advokater, aaqq.) suliassaraat pisimasut tamakkiisut suliamut pineqartumut tunngasut misissornissaat nassuiarlugillu, juulip 22-ani 2021-imi borgmesteri atorfilittallu pingasut Nuummi akiuussusersuiffimmut takkullutik akiuussusersuinermilu ataqatigiissaarisumit Anna Wangenheimimit tikilluaqquneqarlutik, sulinissamut tunngavissami arfinilinnik immikkoortulimmi allassimavoq.
Misissuisup aamma misissussavaa nassuiaavigalugulu aqutsinermut maleruagassat tunngavigineqartullu avaqqunneqarsimanersut, allassimavoq, erseqqissarneqarporlu ”misissuisup ingammik misissussagaa qulaajarlugulu nunatsinni tusagassiuutini sioorasaarinertut pissaanermik atornerluinertut il.il. taaneqartut”.
Eqqartuussissuserisut misissuinissamut qanoq piginnaatinneqarsimanersut AG-mi sapaatip akunnerani matumani saqqummersumi paasisaqarfigineruuk: