Akiuussusersuinissamut pilersaarut saqqummiunneqarpoq
Nunatsinni nakorsaaneqarfiup ukiakkut ukiullu ingerlanerani nunatsinni COVID-19-imik, tunillaassuuttup omikronimut assingusup atugaanerpaanissaa naatsorsuutigaa, taamaattumik akiuussusersuinissamut pilersaarut saqqummiunneqarpoq.
Ukiamut inuit 50-iniit ukiullit kiisalu akiuussutissakinnerusut 50-it ataallugit ukiullit akiuussutissamik imaluunniit akiuussutisseqqinnissamik (sisamassaanik) neqeroorfigineqassapput.
Tamanna tusagassiutinut nalunaarutigineqarpoq.
Nunatsinni nakorsaaneqarfiup ukiakkut ukiullu ingerlanerani nunatsinni COVID-19-imik, tunillaassuuttup omikronimut assingusup atugaanerpaanissaa naatsorsuutigaa. Taamaattumik Naalakkersuisut Nunatsinni Nakorsaaneqarfiup innersuussutai tunngavigalugit akiuussusersuinissamik pilersaarusiornissaq aallartinneqarnissaa aalajangiiffigaat.
Nappaalanersuup isumagineqarnissaanut tunngatillugu, akiuussusersuineq pingaaruteqarluinnartutut isigineqarpoq.
Tunillatsittoqannginnissaa
Pingaarnertut siunertaapput akiuussusersuinermut pilersaarutip napparsimanerit toqusoornerillu pinaveersaarneqarnissaat peqqinnissaqarfiullu annertuumik artukkerneqannginnissaa. Taamaasilluni akiuussusersuinissamik pilersaarummi kingunerluutaasinnaasut tunngavigineqarput, tunillatsinnaveersaarnissarlu siunertarineqarnani, nalunaarutigineqarpoq.
Kikkut COVID-19-mut akiuussusertinnissamut neqeroorfigineqassappat?
Inuit 50-it sinnerlugit ukiullit aamma 50-it ataallugit ukiullit akiuussutissakinnerusut akiuussuserneqarnissamut imaluunniit sisamassaanik akiuussuseqqinnissamut neqeroorfigineqassapput. Inuit akiuussutissakinnerusut 50-it ataallugit ukiullit nakorsamit nalilersorneqareernerup kingorna akiuussutissamik neqeroorfigineqassapput.
Inuit 50-it ataallugit ukiullit, matumani peqqinnissaqarfinni paaqqinnittarfinnilu sulisut imaluunniit perululersinnaanerusut qanigisai ilanngullugit akiuussuserneqarnissamut neqeroorfigineqassanngillat. Tamatumani pissutaavoq akiuussusersuinissamut pilersaarut kingunerluutaasinnaasut pillugit aaqqissuunneqarmat tunillatsinnaveersaarnissarlu pineqarnani.
Akiuussusersuineq qaqugu aallartissava?
Akiuussusersuineq 1. oktober 2022 aallartinneqarnissaa naatsorsuutigineqarpoq. Inuit covid-19-mik peruluuteqalersinnaasut sapinngisamik annerpaamik illersorumallugit aallartinnissamut ullorititaq aalajangerneqarpoq.
Sumiiffik paasissutissallu allat kingusinnerusukkut tamanut saqqummiunneqarumaarput.