Akiuussusersimanngitsut tunillatseratarsinnaanerat tallimariaammik qaffasinnerusoq
Tunillatsissimasut akornanni akiuussusersimanngitsut akiuussusersimasullu amerlaqatigiiginnaraluartut, taamaattoq akiuussuserneqarsimanngitsut tunillatseratarsinnaanerat qaffasinnerungaatsiarpoq. Nunatta nakorsaanera tamassumunnga tunngatillugu nassuiaavoq.
Akiuussuserneqarsimanngikkuit coronavirusimik tunillatsinnissannut aarlerinaat akiuussusersimasunut sanilliullugu tallimariaammik annertuneruvoq.
Nunatta nakorsaaneqarfia taama inerniliussaqarpoq, tunillatsissimasut akornanni akiuussusersimasut, akiuussuserneqanngitsut, ataasiarlutik kapitissimasut meeqqallu immikkoortillugit kisitsisinngortinneqareerneranni.
Coronavirusip siorna upernaakkut nunatsinnut peqqaarneranit oktoberip 25-ani innuttaasut katillugit 746-t tunillatsereersimapput.
Tunillatsissimasut ima inissipput:
- Akiuussuserneqarsimanngitsut 29 procent
- Akiuussusersimasut 28 procent
- Ilaannakortumik akiuussusersimasut 13 procent
- Meeqqat akiuussusersinnaanngikkallartut 29 procent
- Akiuussusersimanermut paasissutissat ilisimaneqanngitsut 1 procent
Akiuussusersimasut tunillaanikinnerusarput
Procentiusut kisitsisinngortikkaanni akiuussusersimasut tunillatsissimasut 210-t missaanniipput, akiuussusersimanatillu tunillatsissimasut 215-it missaanniillutik.
Nunatta nakorsaaneqarfiata nassuiaatigaa kisitsisit taakku nunatsinni katillugit akiuussusersimasunut akiuussusersimanngitsunullu sanillersuunneqartariaqartut.
Nunatsinni innuttaasut 36.000-t akiuussusertissimapput. Taamaasilluni taakkunannga 0,58 procentit coronamik tunillatsissimapput.
Innuttaasut 7.000-it suli akiuussusertissimanngillat, taakkunanngalu 3 procentit tunillatsissimallutik.
- Tamanna isumaqarpoq akiuussusertissimanngikkuit, akiuussusertissimasunut sanilliullugu tunillatsinnissarnut aarlerinaat tallimariaammik annertuneruvoq. Tassunga ilanngunneqartariaqarpoq tunillatsissimasut akiuussusertissimagaangamik allanut tunillaanissaannut aarlerinaateqarnerat annikinneerarsuusarpoq, nunatta nakorsaaneqarfianit ilisimatitsissutigineqarpoq.
Akiuussusersuinermut pilersaarutit corona.nun.gl-imi takusinnaavatit.