Aningaasanut siunnersuisoqatigiit
´Akitsuutit qaffakkaluttuinnartut inuussutissarsiutini ineriartornermik pitsaasumik pilersitsinavianngillat´
Taamatut oqarpoq GE-p pisortaa Brian Buus Pedersen, Aningaasaqarnermut Siunnersuisoqatigiit innersuussutigalugit, taakkua nalunaarusiaminni nutaami erseqqissarmassuk akileraaruseeriaatsip allanngortinneqarnera inuussutissarsiutit ineriartortinnerannut ikorfartuutaasariaqartut
– Aningaasarsiornerup siuariarnissaanik ilimanartoqaraluartoq ernumassuteqarnissamut tunngavissaqarpoq. Tassami siuariarneq taamaallaat pissuteqarneq nunarsuarmi aalisakkat qaleruallillu akiisa qaffariartornerannik sanaartornerullu iluamik ingerlanneqaqqilerneranik, ajoratuartumilli pisariaqartunik aaqqissuusseqqinnerup, nunatsinni inuiaqatigiinni aaqqissuussaanikkut ajornartorsiutaannik qaangiisitsisussat, sunniutaat suli takkussimanngillat, Sulisitsisut Peqatigiiffiata (GE) pisortaa Brian Buus Pedersen oqarpoq.
Aningaasanut politikki nalorninartulik
Aningaasanut inatsisissatut siunnersuutikkut landskarsi 2015-imi, 2016-imi 2017-imilu 65 millioner koruunit missaannik amigartoorfiussaaq. Tamatuma kingorna Naalakkersuisut naatsorsuutigaat 2018-imi 2019-imilu sinneqartooruteqartoqassasoq, tamatumalu kingorna pisortat aningaasaqarnerat oqimaaqatigiilissasoq.
– Tamanna tusartareernikuuarput. Siusinnerusukkut aamma aningaasanut inatsisitigut siunissami aaqqissuusseqqinnerit landskarsimik sinneqartooruteqartitsisalissasut neriorsuutigineqartarsimavoq. Pissutsilli imaapput, aaqqissuusseqqinnissat tamakkua kinguartinneqaqattaartarlutik, taavalu sinneqartoorutissatut naatsorsuutigisat amigartoorutinngortarlutik. Tamanna nalorninermik pilersitsisarpoq, ajornerpaagaangallu aningaasanut politikki ingerlanneqartoq tatigineqarunnaartarpoq. Taamaattumik aningaasanut politikkimut tatiginninnissamut pingaaruteqarpoq tamassuma nanginneqaqqinnginnissaa, Brian Buus Pedersen tikkuaavoq.
Aningaasaqarnermut Siunnersuisoqatigiit nalunaarusiaannut nutaanut Sulisitsisut Peqatigiiffiata oqaaseqaatai Sermitsiami normu 39-mi atuakkit uani: