Akitsuutit nutaat unnuamiit atuutilissapput
Tupat, sukkut, mamakujuttut sukkullit, imigassat aalakoornartullit, puussiat plastikkinit suliaasut kiisalu neqeroorutit aviisit nunatsinnut eqqunneqartillugit akitsuusersuisarneq unnugu unnuap qeqqanut atuulissaaq.
Allannguutissatut siunnersuut, aningaasaqarnermut naalakkersuisumit Vittus Qujaukitsumit (NQ) ullumi nalunaaqutaq 11:00 qaangilaaginnaraa saqqummiunneqartoq, tassa nioqqutissat arlallit nunatsinnut eqqunneqarneranni akitsuusertalernissaannut tunngasoq, ulloq 19. november 2019 aallarnerfigalugu atuutilissaaq.
Nioqqutissat uku eqqunneqarnermi akitsuuserneqassapput:
- Sukkut suulluunniit
- Sukkulaatit, nioqqutissallu sukkulaatitaqartut allat, lakridsit aamma nioqqutissat lakridsillit, marcipanit aamma nioqqutissat marcipanillit, kukkarnaat, bonboner, sukkuaqqat assigisaallu, sukkoqarnersut sukkoqarnersulluunniit apeqqutaatinnagit
- Imigassat aalakoornartullit aalakoornartup annertussusaa malillugu akitsuusersorneqassapput
- Cigaat, cerutter aamma cigarillos
- Cigarettet ataasiakkaarlugit
- Tupat pujullit aamma tupat pujoqanngitsut, soorlu sukuluut
- Tupat pappialaarartaat
- Puussiat plastikkinit suliat
- Neqeroorutit aviisit
Ingerlattakkat uku aamma ilanngullugit eqqunneqarneranni akitsuuserneqassapput:
- Ingerlatit motoorillit minnerit traktorillu
- Naalagaaffiit allamiut ingerlatsissutaat
- Nunakkut aqqusineqanngitsukkut ingerlasinnaasut sisamanik amerlanernilluunniit assakaasullit (ATV, UTV il. il.)
Aningaasaqarnermut naalakkersuisup Vittus Qujaukitsup allannguutissatut siunnersuutit saqqummiutereermagit inersuarmi oqallittoqangaatsiarpoq.
Vittus Qujaukitsoq oqallinnermi nassuiaavoq, nioqqutissat ilaannut eqqussinermi akitsuutit aamma biilit innaallagiatortunut akitsuutit 2021-imi atuutilersussat, aningaasanut inatsit 2020-moortumut matussusiinermut atussasut.
Nioqqutissat eqqunneqarnerannut akitsuutit ukiumut 45,5 milliuunit koruuninik isertitsissutaasassapput, biilinullu innaallagiatortunut akitsuusiineq ukiumut 2,6 milliuunit koruuninik isertitsissutaasassalluni. Ukiut sisamat ingerlaneranni iluanaarut 220 koruuniussaaq.
Naalakkersuisut Demokraatillu aningaasanut inatsit pillugu isumaqatigiissut ullaaq manna atsiorpaat, isumaqatigiissut malillugu 1,7 milliuunit koruuninik ukiuni sisamani tullerni sinneqartoortoqassaaq.