Akitsuutit erninermut atatillugu sulinngiffeqartarneq akilissavaat

Arnat meerartaarsinnaasutut ukiullit ernisussaanerat sulinngeeqartussaanerallu suliffeqarfinnut akisuallaarnerat pissutigalugu suliffeqarfinni naminersortuni sulisoriumaneqartassanngillat.

Suliffeqarfiit tamarmik naligiissaarinermut aningaasaateqarfimmut nutaamut akiliuteqartasapput, tassa suliffeqarfiit aningaasarsianut aningaasrtuutigisartagaasa annersaat erninermi aningaasaateqarfimmit utertinneqartassapput.

Aningaasaateqarfik Naalakkersuisut inatsisissatut siunnersuutaasa marluk annertuut pingaarutilittut ilagisaat ukiakkut ataatsimiinnermi suliarineqassapput. Siunnersuutip aappaa aqqutigalugu erninermut atatillugu sulinngiffeqartarnermut malittarisassat allanngortinneqassapput, siunnersuutillu aappaa aqqutigalugu akitsuutinik atuutsitsisoqalissaaq, erninermi aningaasaateqarfimmut aningaasalersuisussanik.

Siunnersuuteqarnermi anguniarneqarpoq, arnat namminersortuni sulisut erninerminni pitsaanerusunik atugassaqartinneqalernissaat.

Namminersortuni sulisut aningaasarsiaqarsinnaatitaassasut

Allannguutit ilaatigut makkunannga atuutitsilissapput:

Namminersortuni sulisut tamarmik erninermut atatillugu sulinngiffeqarnerminni aningaasarsiaqarsinnaatitaanerat.

Namminsersortuni sulisoq sulinngiffeqalerpat, sulisitsisup sulisup sulinngiffeqartup aningaasarsiaanut aningaasartuutai erninermi aningaasaateqarfimmit utertittassavai.

Erninnginnermi sulinngiffeqartarneq sapaatip akunneranik marlunnik sivitsorneqassaaq, katillugit sapaatip akunnerini sisamani sulinngiffeqartoqartalerluni.

Arnat angerlarsimaffiup avataani ernisussatut innersuunneqarsimasut sulinngiffeqarsinnaatitaalissapput.

Angajoqqaat sulinngiffeqarnerminni meeqqamik annaasaqartut, sapaatip akunnerini sisamani sulinngiffeqarsinnaatitaalissapput.

Suiaaqatigiillutik angajoqqaajusut inatsisitigut inissisimanerat pitsaanerulersinneqassaaq.

Inatsit atuutsinneqalerpat nunami suliffeqarfiit tamarmik sulisoqarnermut akitsuutinut akiliuteqartalissapput. Akitsuutit ukiut tamaasa aningaasanut inatsimmi aalajangersarneqartassapput, akitsuutit erninermi aningaasaateqarfimmi aningaasartuutinut naapertuuttunngortillugit.

Akitsuutit ukiumi siullermi atuutsinneqarneranni aningaasarsiat tamarmiusut 2 promilliata missaanik, tassa 19 mio. koruunit missaannik annertussuseqassasut naatorsuutigineqarpoq.

Ilanngaateqartarneq atorunnaarsinneqassasoq

Tamakkua saniatigut Namminersorlutik Oqartussat namminersortuni sulisut erninerannut atatillugu ullumikkut aningaasartuutigisartakkamik annertoqqataannik aningaasaateqarfimmut ukiut tamaasa tapiissuteqartassapput. 2022-mi aaqqissuussaq tamarmiusoq atuutsinneqalerpat tamanna 21,6 mio. koruunit missaannik akeqassasoq naatsorsuutigineqarpoq.

Inatsisissatut siunnersuut ilaatigut aqqutigalugu, pisortat namminersortuni sulisut sulinngiffeqarneranni aningaasarsiarisaannut ilanngaateqartarnerat pillugu malittarisassaq atorunnaarsinneqassaaq.

Sulinngiffeqarnermi ullumikkut malittarisassat atuuttut ukuupput:

Arnaq naatsorsuutigissatut erniffissani sioqqullugu sapaatip akunnerini marlunni sulinngiffeqarsinnaatitaavoq kiisalu meeqqamik ataatsimik erninermini sapaatip akunnerini 15-ini sulinngiffeqarsinnaatitaalluni.

Marlunnik amerlanerusunilluunniit erninermi sapaatip akunnerini 19-ini anaanaasoq sulinngiffeqarsinnaatitaavoq.

Ataataasut sapaatip akunnerini pingasuni suinngiffeqarsinnaatitaapput.

Tamatuma saniatigut angajoqqaat meeqqamik ataatsimik erninermi imaluunniit meeravissiartaarnermi sapaatip akunnerini 21-ni sulinngiffeqarsinnaatitaapput, meeqqanillu marlunnik amerlanerusunilluunniit erninermi sapaatip akunnerini 25-ni sulinngiffeqarsinnaatitaallutik. Angajoqqaat namminneq aalajangertassavaat kina angajoqqaatut sulinngiffeqassanersoq aamma paarlakaallutik sulinngiffeqarsinnaapput.

Angajoqqaat sulinngiffeqarnissaq sioqqullugu sapaatip akunnerinit 13-ini kingullerni sulisimasut, sulinngiffeqarnerminni ullormusiaqarnissamut pisinnaatitaapput.

Pissarsiffik: Naalakkersuisut

Allannguut aqqutigalugu erninermut atatillugu sulinngiffeqartoqarnerani sulisitsisut tamakkiisumik aningaasarsiaqartitsisarnerat malunnaatilimmik akikinnerulissaaq.

Pisortani sulisut aaqqissuussamut ilaatinneqanngitsut

Siunnersuummut nassuiaatit naapertorlugit, pisortani sulisut amerlanersaat isumaqatigiissutit naapertorlugit sulinngiffeqarnerminni aningaasarsiaqarsinnaatitaapput. Taamaammat erninermi aningaasaateqarfik pisortani sulisunut atuutsinneqassanngilaq:

- Pisortani sulisut, taakkununnga ilanngullugit danskit naalagaaffianni sulisut sulinngiffeqarnermi aningaasarsiaqarsinnaatitaanermut ilaatinneqanngillat, isumaqatigiissutitigulli imaluunniit atorfininnermi atugassarititaasut allat naapertorlugit aningaasarsiaqarsinnaatitaanngikkunik ullormusiaqarsinnaatitaanerat atuutsiinnarneqassasoq, nassuiaatini allassimavoq.