Akitsuutinik appaaqqusineq unitsikkallaqqugaa

Naalakkersuisut akitsuutinik arlalinnik appaasoqarnissaanik siunnersuut soqutiginartippaat, inassutigaluguli akitsuutinik appaasinnaaneq akileraartarnermik aaqqissuusseqqinnermut atatillugu suliarineqassasoq.

Demokraatit siulittaasuat Jens-Frederik Nielsen akitsuutit apparneqarnissaannik arlalinnik siunnersuuteqarsimavoq, sisamanngornermi Inatsisartuni suliarineqartussanik.

Ulluinnarni nioqqutissanut, soorlu kaffinut, themut neqinullu akitsuusit apparneqarnissaat taassuma piumsaraa. Tamtuma saniatigut 2019-imi sukkut, lakridsinut sukkulaanullu il. il. akitsuutit qaffanneqarsimanerat atorunnaarsinneqassasut siunnersuutigaa.

Siunnersuutigineqartut Nunatta Karsianut ukiumut katillugi 30 millioner koruunit missaannik akeqassapput, partiimilu siulittaasup siunnersuutigaa, aningaasat aningaasanut inatsimmi ingerlatsinermut- ilassutitullu tapiissutinut 1 procentimik sipaarniarnikkut nassaarineqassasut, tassa 56 millioner koruunit nalingannik sipaaruteqarnikkut.

Taamatulli siunnersuuteqarnera Aningaasaqarnermut Naalakkersuisup isumaqatigivallaanngilaa:

Aaqqissuusseqqinnermut atatillugu suliarineqartariaqartoq

- Taamaattoq sioqqutsisumik misissuinani, tamatumalu sunniutissai qulaajaaffiginagit, ataatsimut isigalugu sipaaruteqarnissaq piviusunngortinneqarsinnaanngitsoq Naalakkersuisut isumaqarput. Assersuutigalugu kontunik pingaarnernik peqarsinnaavoq Namminersorlutik Oqartussat isumaqatigiissutitigut pisussaaffeqarfigisaannik.

- Tamatuma saniatigut taamatut sipaaruteqarnermi Namminersorlutik Oqartussat qitiusumik allaffeqarfiat kisimi pineqartunut ilaatinneqartussaanngilaq, kisianni aamma sullissiviit ataaniittut aamma Namminersorlutik Oqartussat ataanni tapiissutit pineqartunut ilaatinneqartussaallutik, soorlu peqqinnissaqarfimmi suliassaqarfik aamma ilinniartitaanermut suliassaqarfik, Aningaasaqarnermut Naalakkersuisoq akissuteqaammini allappoq.

Aningaasaqarnermut naalakkersuisup siunnersuutigineqartut soqutiginaateqartutut oqaatigai, innersuussutigalugulu akileraartarnermik akitsuusersuisarnermillu pilersaarutaasutut aaqqissuusseqqinnissamut atatillugu siunnersuutigineqartut politikkerinit misissorneqassasut, aaqqissuusseqqinnissaq ukiap ingerlanerani aallartinneqassasoq Naalakkersuisunit naatsorsuutigineqarpoq:

- Taamaaliornermi siunnersuutit aalajangersimasut Kalaallit Nunaanni siunissami akileraarutinut akitsuutinullu ilusiliussassanut isumaliutiginninnernut ataqatigiissillugit suliarineqarnissaat qulakkeerneqassaaq.

Powered by Labrador CMS