Akitsuuserisut sulisussanik amigaatillit
Siumut allornerit tallimat utimullu tallimat. Nunami akitsuuserisut taamatut inissisimapput, taakkununnga aningaasaliissutit 2018-imi qaffanneqaraluartut atorfiit inuttaqanngitsut inuttalerniarnerat ajornartorsiutaavoq
2018-imut aningaasanut inatsimmut atatillugu aalajangiunneqarpoq, akitsuuserisiut nukittorsarnqassasut, tassungalu atatillugu tre millioner koruunit immikkoortinneqarput, hashimik eqqussuineq akiorniarlugu immikkullu ittumik akitsuuserisunik pingasunik allaffimilu sulisussamik ataatsimik atorfinitsitsinissamut atugassat.
- Akileraartarnermut Aqutsisoqarfik 2018-imi januaarip aallaqqaataanili akitsuuserivimmi atorfinnik tallimanik inuttaliisimavoq. Atorfiit taakku ilaat atuutereersuupput, allalli atorfiit amerlineqarnerannut attuumassuteqarput, Vittus Qujaukitsoq Peter Olsenip paragraf 37 naapertorlugu apeqqutaanut akissuteqarami ilisimatitsivoq, Aningaasaqarnermulli Akileraartarnermullu Naalakkersuisoq nuannerpallaanngitsumik ilanngussivoq:
Tallimat suliffimminniit soraarsimapput
-Piffissami pineqartumi akitsuuserisut tallimat atorfimminniit soraarsimapput. Malugeqquneqarpoq, sulisut suliunnaarsimasullu akornanni pissutsit nalaatsornikkut pisimanngimmata. Tassa 2018-imut sanilliullugu akitsuuserisut maannamut suli amerlanerulersimanngillat, akissuteqaammi taamatut allassimasoqarpoq.
Sulisunik amigaateqartoqaraluartoq, 2019-imi ukiup siulianut sanilliullugu umiarsuarnik tingerlaasersortunik nakkutilliisoqarnerusimavoq.
Umiarsuarnik tingerlaasersortunik nakkutilliinerunissaq
2018-imi umiarsuarnikt tingerlaasersorlutik nunatsinnut nunatsinniillu ingerlaartunik tallimariarluni misissuisoqarsimavoq. 2019-imi akitsuuserisut maannamut 22-riarlutik misissuisimapput. Misissuisoqarnerulersinnaasimavoq ilaatigut Ilulissani akitsuuserisunik marlunnik atorfinitsitsisoqarneratigut.
– Umiarsuit tingerlaasersortut nakkutigineqartarnerannut sanilliullugu umiarsuit allat nunatsinnut nunatsinniillu ingerlaartut nakkutigineqarnerusimapput. Naalakkersuisulli nakkutilliisussat eqqarsaatigalugit, umiarsuarnik qanoq amerlatigisunik nakkutilliisoqarsimanersoq ilisimatitsissutigerusunngilaat, Vittus Qujaukitsoq akissuteqaammini ilisimatitsivoq.