Akitsuuserisut iluatsittut: Ikiaroornartut annertuut nassaarineqartut
Ikiaroornartut hashit katillugit 38 kiilut Kalaallit Nunaanni akitsuuserisunit 2018-imi arsaarinnissutigineqarput. Tupat ukiup siulianit affaanit ikinnerusut arsaarinnissautigineqarput.
Kalaallit Nunaanni akitsuuserisut ikiaroornartunik hashinik katillugit 37,8 kiilunik 2018-imi arsaarinnissutiginnipput. 2017-imi arsaarinnissutigineqartunit 3,3 kiilunik oqimaannerupput. Qaffariaat 9 procentiuvoq. Akileraartarnermut Aqutsisoqarfiup akitsuuserisoqarfia Sermitsiaq.AG-mut taama ilisimatitsivoq.
9 procentimik qaffariaat annertugisassanngilaq, 3,3 kiilulu hashi aamma uippallissutaasariaqarani. Ikiaroornartorli hashi 3,3 kiilu pinerlunniartut tuniniarpassuk taanna 2,3 milliuunit koruunit 3,3 milliuunit koruunillu akornanni isertitsissutaasinnaavoq.
Ikiaroornartoq tuniniaasumiit pisisumut tunniunneqarpat, taava hashi 1 grammisut oqimaassuseqartoq 700 koruunit 1000 koruunillu akornanni akeqartarpoq. Kalaallit Nunaanni Politiit taama ilisimatitsipput.
Hashi 37,8 kiilu 2018-imi arsaarinnissutigineqartoq taamaasilluni 26,5 milliuunit 37,8 milliuunit koruunillu akornanni naleqarpoq.
Mittarfinni qimmit nutaat
Akitsuuserisut akitsuuserisunik pingasunik 2018-imi atorfinitsitsipput. Ilulissani marluk Kangerlussuarmilu sulisut ataatsimik ilallugit.
- Ungasissorsuunngitsumi atorfinitsippagut, taamaattumik oqarsinnaanngilagut pissutaaqataasut ikiaroornartunik arsaarinninnerunitsinnut, siunissamili iluaqutiginerunissaat naatsorsuutigaarput, Ferdinand Hammeken, akitsuuserisuni immikkoortortami pisortaq oqarpoq.
Taanna nassuiaavoq akitsuuserisut atorfinitsinneqarsimasut qimmiminnik maanna sungiusaasut, taakku ilaasunik assartukkanillu Ilulissatigoortunik Kangerlussuakkoortunillu misissuisassallutik.
Tupat arsaarinnissutigineqartut ikileriartut
Ikiaroornartunik arsaarinninnerup saniatigut akitsuuserisut suliassaasa ilagaat inuit tupanik imigassanillu qanoq annertutigisunik nunatsinnut eqqussinissamut tunngatillugu maleruagassanik “puigorsimasut” unitsissallugit.
Tupat 2018-imi arsaarinnissutigineqartut ukiup siulianut sanilliullugit affaat sinnerlugit ikinnerupput. Tupat kartonit 174-it 2017-imi arsaarinnissutigineqarput. 2018-imi 84-iupput.
Taakku saniatigut immiaaqqat, viinnit imigassallu katillugit 120 liiterit 2018-imi arsaarinnissutigineqarsimapput.