Akitsuuserisut 'Grønlandshavn'-imi qerisunut puussiani otte millioner koruuningajalluinnarnik nassaarsimasut
7,7 millioner koruunit qerisutut nassiusssat akornannut toqqorluarneqarsimapput. Suliaq Kalaallit Nunaanni Politiinut suliassanngortinneqarsimavoq.
Danmarkimi Toldstyrelsi oktobarip qaammataata qiteqqunnerani aningaasanik miliuunilikkaanik qaqutiguinnaq nassaartarput.
Aqutsisoqarfiummi 7,7 millioner koruunit qerisutut nassiussat akornanniittut nassaarisimavai. Aningaasat qerisunut puussianut poorlugit qerisutut nassiussat akornannut toqqorneqarsimaput, aningaasallu taakku Kalaallit Nunaannit nassiunneqarsimallutik.
Toldstyrelsimit tamanna pingasunngornermi tusagassiorfinnut nalunaaruteqarnermi oqaluttuarineqarpoq.
Pallet arlallit qerisunik imallit Aalborgimi Grønlandshavnimi misissugassatut illuartinneqarsimapput. Akitsuuserisut pappialaataat naapertorlugit nalinginnaasumik qerisut nassiunneqarsimasut pineqarput, misissuilluarnermili 7,7 millioner koruunit nassiussat akornannut toqqorneqarsimasut nassaarineqarsimallutik.
Qerisutut nassiussat akornannut toqqorluarneqarsimasut
Aqutsisoqarfimmi nakkutilliinermut pisortap Michael Lundip akitsuuserisut nersualaarpai, oqaatigalugulu "akitsuuserisut nakkutilliinerminni sulilluarsimasut".
- Aningaasarpassuit qerisutut nassiussat akornannut toqqorluarneqarsimapput. Poortukkat sinaanni takusassaqanngilaq, akitsuuserisulli skannerinerigamik qimmillu aningaasanik naamasaqarsinnaasut misissuitikkamikkit aningaasarpassuit nassaarisimavaat, tamatumalu kingornatigut politiit ilisimatinneqarsimallutik, taanna aqutsisoqarfik tusagassiorfinnut nalunaateqarmat oqarpoq.
Aqutsisoqarfik aningaasat suminngaanneernersut pillugit allassimanngilaq, ilisimatitsissutigaali suliaq Kalaallit Nunaanni Politiinut suliassanngortillugu ingerlateqqinneqarsimasoq.
Toldstyrelsip Sermitsiaq.AG-mut ilisimatitsissutigaa, aqutsisoqarfiup ilaatigut misissuisoqarnera eqqarsaatigalugu aningaasat suminngaanniit nassiunneqarsimanersut ilisimatitsissutigisinnaanngikkaa, taamaallaalli suliaq Kalaallit Nunaanni politiinut suliassanngortillugu ingerlateqqinneqarsimasoq ilisimatitsissutigisinnaallugu.
9,4 mio. koruuniuteqarluni timmisartoqarfimmi tigusarineqarsimasoq
Otte millioner koruuningajalluinnaat Toldstyrelsenimut ilaatigut Danmarkip killeqarfiisigut eqqunneqartunik misissuisartumut aningaasarpassuupput.
Aningaasat taakku Toldstyrelsenip 2019-imi 2020-milu katillugit 22 millioner koruunit nassaarisimasaasa pingajorarteruterutaannik amerlanerupput.
Taamanikkut ilaatigut angalasoq ataaseq nunat assigiinngitsut aningaasaataannik 9,4 millioner koruuninik nalilinnik kaasarfimmioqarluni Københavns Lufthavnimi tigusarineqarami, malittarisassanik malinnissimanngitsutut 2,3 millioner koruuninik akiligassinneqarsimavoq.
Sermitsiaq.AG suliaq pillugu Kalaallit Nunaanni Politiit oqaaseqartinniarlugit suliaqarpoq.