Akit qaffakkiartornerat RG-mut iluaqutaavoq
Kalaallit Nunaanni aalisarnermi akitsuutinut akilersukkat amerleriaraluartut Royal Greenlandip akileraannginnermi sinneqartoorutai 2018-ip qiteqqunnerani 50 million koruuninut pitsanngoriartinneqarput.
Royal Greenland 2018-ip qiteqqunnerani angusarissaarpoq. Tamanna suliffeqarfiup ukiup affaanut missingersuutaani takuneqarsinnaavoq.
Naak kaaviaartitat ikileriaraluartut pingaarnertut tunisassianik tunisaqarnerup pitsanngoriarnera ingerlalluartoqarneranut pissutaavoq.
- Raajanik uusunik qalipaajakkanillu tunisaqarneq ukiuni kingulliunerusuni akitigut appariarfiusimallunilu tuluit aningaasaasa nalingisa appariarnerannik sunnerneqarsimagaluartoq tunisinermi akitigut qaffariartorfiummata tunisatigut qaffariaateqarfigisinnaasimavagut, pisortaaneq Mikael Thinghuus naliliivoq.
Royal Greenlandip akileraannginnermi sinneqartoorutai 2018-ip qiteqqunnerani 50 million koruuninut pitsanngoriartinneqarput, kisitsit ukioq kingulleq taamaalinerani 37 million koruuniusoq.
Royal Greenlandip niuernikkut ineriartorluarnera suliffeqarfiup ukiuni kingullerni arfineq-marlunni piviusunngortissinnaasimasaa attatiinnarneqassangatinneqarpoq. Taamaattorli aalisarnermi akitsuutit qaffariarnissaat nunallu allat aningaasaasa nalingisa appariarsinnaanerat pissutigalugit 2018-imi akileraannginnermi angusat 2017-imi angusanit appasinnerulaassangatinneqarput.