Akisussaassuseqanngitsumik imaatigut angalasut politiinik ulapitsitsipput
Innuttaasut umiatsiami VHF-radiominnik ajornartorsiuteqaraluarlutik ilaquttatik ilaasoralugit angalaarlutik aallartut ilaqutaasunut isumaalutsitsilersarput politiinillu ulapititsilertarlutik. Atortut ajunnginnissaat qulakkeeqqaarsigit, politiit kaammattuipput.
Juulip qaammataani weekend siullermi politiit suliassaqangaatsiarsimapput. Aalakoornermik aallaaveqartumit pisut politiinit orninneqartariaqartarsimapput.
Imaatigulli angallanneq aamma unammillernartoqarsimavoq.
Kalaallit Nunaata Politiivini pigaartut pisortaat oqaluttuarpoq ullup unnuallu ataatsip ingerlanerani imaatigut angalasut pillugit pisunik marlunnik nalunaarfigineqarsimallutik.
Politiit ippassaq ualikkut nalunaarfigineqarput avannaani umiatsiaq angalaartoq tikinngitsoorsimasoq. Najugaqarfimmit ujaasineq aallartinneqarsimavoq. Angalasulli namminneerlutik najukkaminnut tikissinnaasimallutik.
Tunumi sapaatip unnuaani assingusumik pisoqarpoq. Ilaqutaasut isumaalulerlutik tikinngitsoortut nalunaarutigaat, angalasulli kingusinnerusukkut tikipput.
- Pisuni taakkunani, qangaaniilli pisartut assigalugit, angalasut ajutoornissartik ilimaginngivillugu sillimanissamut atortulukkaluarlutik aallartarput. Atortui, soorlu VHF-radio aamma motoorii ajorsinnaasarput. Innuttaasup kialluunniit nalunngilaa aasaanerani pujoq takkuteriasaartartoq, tamannalu aallaavigalugu imaatigut pisinnaasut tamaasa sillimaffigalugit angalasoqartariaqaraluarpoq, pigaartuni pisortaq, Johan Westen, Sermitsiaq.AG-mut oqarpoq.
Atortut ajunngitsut qulakkeersigit
Pigaartut pisortaata innuttaasut imaatigut angalaniartut atortuminnik qulakkeerinneqqaarnissaannik kaammattorpai.
- Radio, atisat oqortaatit, motoori assigisaallu. Taakku misissorneqartariaqarput ajunnginnersullu qulakkeerlugit, aallannginnermi. Imaatigut angalaarniartut angalaarnerminni ilaquttaminnut ataavartumik attaveqartarnissaat aamma kaammattuutigiumavarput, ilaqutaasut asuli isumaalulinnginnissaat anguniarlugu, oqarpoq.
Ujaasinerni marlunni pineqartuni ajutoortoqarsimanngilaq, angalasullu namminneq utersinnaasimallutik.