kommuninut qinersineq 2017
- Akisussaaffimmut piareersimavunga
Kiista P. Isaksen Siumup siulittaasuata tullianit ukiunilu sisamani borgmesteriusimasumit Jørgen Wæver Johansenimit marloriaammik taagorneqarneruvoq. Maanna pissaanermut matuersaat paaraa.
Kiista P. Isaksen nuannaarluinnartoq Kommune Kujallermi Siumumit borgmesteritut akisussaaffimmik tigusinissamik piareersimavoq.
- Oqarasuaatiga ullaarli sianiinnavippoq, inernerit misissorluarnissaannut piffissaqarluarsimanngilanga. Kisianni kingullermik takugakkit Siumut amerlanerussuteqarluarniarpasippoq, taanna oqarpoq.
- Taamaalillutit borgmesterinngussaatit. Piareersimavit?
- Akisussaaffimmik tigusinissannut piareersimavunga, Kiista P. Isaksen akivoq, taanna Narsap Kommunerisimasaani borgmesteritut misilittagaqareerpoq.
Siammasissumik suleqatigiinneq
Parteeqatini Jørgen Wæver Johansen aamma Simon Simonsen kommunalbestyrelsimi suleqatiginissaannut qilanaarpoq, politikerit nuimasut taasinertigut taassuma qaangerpai.
Kiista P. Isaksen 456-nit taaguunneqarpoq, Wæver Johansenip aamma Simon Simonsenip taaguunneqarneri katillugit taakku marloriaatingajarai.
- Jørgen aamma Simon qanimut pitsaasumik suleqatiginikuuakka. Partiillu allat siammasissumik suleqatiginissaannut piareersimalluinnarpunga.
Sermitsiaq.AG-p ullaap tungaani Jørgen Wæver Johansen attaveqarfigaa, kisianni qinersinerup inernera oqaaseqarfigerusunngilaa.