Akissutit 37-t nutaat: Allanik tunillatseqqittoqarsimanngilaq

Sapaatiummat misissugassatut tigusat 37-t akissutaat tiguneqarput, taakku tamarmik ajunngillat, Namminersorlutik Oqartussat allapput

Namminersorlutik Oqartussat sapaatiummat nalunaarutigaat, allanik COVID-19-imik tunillatsittoqarsimanngitsoq.

- Ullumikkut sapaammi 5. april misiligutit 37-t tiguneqarsimapput, tamarmillu tunillatsissimasoqanngillat, Namminrsorlutik Oqartussat tusagassiorfinnut nalunaaruteqarnermi allapput.

Ilisimatitissutigineqarpoq, misissugassatut tigusat 25-t akissutaat oqartussanit utaqqineqartut.

- 4. marts 2020 tikillugu inuit 662-it misiligutissanik tigusiffigitissimapput, taakkunanilu aqqanillit tunillatsissimapput, ilanngullugu allassimavoq.

Nalunaarummi erseqqissaatigineqarpoq, coronavirusmik napparsimalersussanut katsorsarneqartariaqartunullu isumaginnilluarniarluni maanna peqqinnissaqarfik piareersaleruttorpoq.

Peqqinnissaqarfik nalinginnaasumik ingerlasoq

Taamaattoq peqqinnissaqarfik amerlanertigut nalinginnaasumik ingerlavoq:

- Perulullutik napparsimasut piaartumillu suliarisariaqakkat nalinginnaasumik misissorneqarlutillu katsorsarneqarsinnaapput, Namminersorlutik Oqartussat allapput, kaammattuutigalugulu:

- Naak maannakkut ulapiffiugaluartoq inuit kikkulluunniit arlaannik perulunnartumik nappaateqarsorisut peqqinnissaqarfimmut misissortinnissaq katsorsartinnissarlu siunertaralugit saaffiginneqquneqarput, Namminersorlutik Oqartussat allapput, nangillutillu:

- Ulluni makkunani pisut nappaatip allap pisariaqarfiatigut suliarineqarnissaanik kinguneqassanngillat. Maannakkut Covid-19 sammineqartupilussuuvoq, nappaatilli allat tamatuma unitsinnavianngilai taakkulu tamanna pillugu puigorneqassanngillat.

www.nun.gl aqqutigalugu, coronavirusimut tunngatillugu paasisaqarnerusinnaavutit kiisalu tunillatsinnginnissat anguniarlugu qanoq iliuuseqarsinnaanerlutit siunnersorneqarlutillu ilitsersorneqarsinnaavutit.

Powered by Labrador CMS