Nunatsinni pinerluuteqarsimasunut inissiisarfinni betjentit akissarsiaasa ukiut marluk matuma siorna qaffaavigineqangaatsiareerneranni, sulisussaqarniarneq pitsaanerulersimavoq. 

Danmarkimi paarnaarussiviit kattuffiat tusagassiorfinnut nalunaaruteqarluni allappoq.

Nunatsinni pinerluuteqarsimasunut inissiisarfiit ukiualuit matuma siorna betjentinik amigaateqangaatsiarsimagaluarput. Nuummi atorfiit 40 procentii inuttaqarsimanatik. Maannali pissutsit allarluinnaasut, sulisut sinniisaat Ikitannguaq Kruse Høiberg oqaluttuarpoq.

- Akissarsiat qaffanneqarnerat allannguerujussuarpoq. Sulisussanik pikkorissunik nutaanik ajornannginnerusumik atorfinittoqartalerpoq, sulisoriinnarneqarsinnaasarlutillu, Ikitannguaq Kruse Høiberg tusagassiorfinnut nalunaarummi oqarpoq.

Pisortat isumaqataapput

Pinerluuteqarsimasut inissiisarfianni betjentit akissarsiaat danskinut suleqataannut nalimmassarlugit 2020-mi 5.600-7.000 koruuninik qaffaavigineqarput.

Nunatsinni pinerluttunik isumaginnittoqarfimmi pisortaagallartoq, Christian Høygaard Sermitsiaq.AG-mut oqaluttuarpoq akissarsiat qaffanneratigut sulisussanik atorfinitsitsiniarneq ajornannginnerulersoq.

- Akissarsiat pitsaanerulernerisa kingunerannik betjentinik sulisoqarniarneq pitsaanerulersimasoq oqaatigineqarmat ilisarilluarsinnaavara. Sulisut suli taarseraassinnaagaluartut, paarlatsitut sulisorineqartut maanna ikinnerujussuupput, pinerluttunik isumaginnittoqarfimmi pisortaagallartoq, Christian Høygaard Sermitsiaq.AG-mut oqaluttuarpoq.

Sulisulli allat, betjentiunngitsut sulisoriniarneri suli ajornartorsiutaasinnaasartut, taarseraannerujussuusinnaasartullu, pisortaagallartoq oqaluttuarpoq.

Atorfinittut amerlanerulertut

Nuummi pineqaatissinneqarsimasunut inissiisarfimmi 2019 betjentit 28-it atorfeqartinneqarsimapput. Betjentit maanna 44-pput. Danskit paarnaarussiviisa kattuffiat naapertorlugu atorfiit inuttassarsiorneqartillugit soqutiginnittoqangaatsiartarpoq, allaat ilaanni atorfimmut ataatsimut qinnuteqartut 35-iusinnaasarlutik.

Akissarsiat qaffangaatsiarnissaanut sulineq oqitsuinnaasimanngitsoq, kattuffimmi siulittaasoq Bo Yde Sørensen oqarpoq. Akissarsialli qaffannerisa kingunerat taassuma tupaallaatiginngilaa.

- Tamannarpiarmiuna anguniarlugu qaffaatitsiniarsarisugut. Neriuppunga tamanna Danmarkimi eqqarsartitsilersinnaasoq. Oqarfigineqartuarpugummi sulisoqarnerup pitsaanerulernissaanut iliuusissat tamaasa misilinneqartut. Kisianni ilumut iliuusissat tamaasa misilinneqarsimappat? Akissarsiat pitsaanerulersinneratigut sulisut amerlanerulersinneqarsinnaasut qularnanngilaq, Bo Yde Sørensen oqarpoq.

Sulisut sinniisaat Ikitannguaq Kruse Høiberg isumaqarpoq pinerluuteqarsimasunut isumaginnittoqarfimmi sulisut napparsimakulaarnerat suli ajornartorsiutaasinnaasartoq. Pinerluuteqarsimasunut isumaginnittoqarfimmi pisortaagallartoq Christian Høygaard isumaqataavoq erseqqissaallunilu ajornartorsiut pimoorullugu iluarsiiviginiarneqartoq, sulisut sinneri sulinerat kalluarneqarpallaaqqunagu.