Akissarsiat qaffanneqarnissaat pillugu Kim ilisimatinneqarsimavoq

Kalaallit Airportsimi juulimi immikkut ittumik ataatsimeersuartoqarnerani siulersuisuni siulittaasup akissarsiaanik 50 procentimik qaffaanissaq Naalakkersuisut akuerisimagaat arlalinnit tupaallaatigineqarpoq.

Siulersuisuni siulittaasup akissarsiai 750.000 koruuniulerput, akissarsiaqqortunerpaanngorlunilu, tunngavilersuutigineqarpoq mittarfiup aningaasassarsiornerani sanaartornerullu nalaani suliassaqarnerulerneq.

Politikkikkut akisussaaffik

Doris J. Jensen Naalakkersuisut siulittaasorigallagaattut issianermini, immikkut ittumik ataatsimeersuartoqarnissaanik akuersivoq. Taamaasilluni Naalakkersuisut tamarmiullutik ataatsimiinnerminni suliamik ilisimatinneqanngitsoornerannut politikkikkut akisussaasutut inissippoq. Sulinngiffeqartoqarnera pissutaavoq, Naalakkersuisut Siulittaasoqarfiani pisortaq, Søren Hald Møller nassuiaavoq.

Paasinarsivorli siulersuisut siulittaasuata akissarsiaanik qaffaasoqalernera, Kim Kielsenimut ilisimatitsissutigineqarsimasoq.

Siulersuisut siulittaasuata akissarsiaanik qaffaanissaq pillugu Naalakkersuisut siulittaasorigallagaatut inissisimasoq tunineqassasoq ilisimatinneqarpit?

Aap, Kim Kielsen naatsumik erseqqissumilli akivoq.

Suleriaaseq nalinginnaanngitsoq

Kim Kielsen sulinngiffeqarnermini aalajagingassanik akuersisarnera nalinginnaanngilaq.

Sulinngiffeqaraluarlutilluunniit aalajagingassat akuereqqaartarneri nalinginnaava, taamaasilluni siulittaasuugallartutut inissisimasoq atsiuinnartussanngorluni?

Naamik, Kim Kielsen akivoq.

Malunnarpoq Doris J. Jensenip Naalakkersuisutut Siulittaasutut inissisimagallarnermini suliassani qanoq politikkikkut akisussaaffeqarnerminik ilisimasaqarsimannginnera.

Atsiortussaannaq

Sermitsiaq.AG-mi allaaserisami saqqummiuteriikkatsinni sammisaq pillugu Facebookikkut ima allappoq:

- Naalakkersuisuni sulinermi ileqquuvoq Naalakkersuisut siulittaasuat peqanngikkaangat, Naalakkersuisuni ilaasortaaqataasup Naalakkersuisut siulittaasuata atsiugassaralua sinnerlugu atsiortoqartartoq. Soorluttaaq aasaq taamatut pisoqarpoq, Naalakkersuisut siulittaasuata Naalakkersuisoqarfianut aggersarneqarpunga atsiugassamillu tunineqarlunga , Doris J. Jensen allappoq, 2018-imilu aasakkut atsiortussaannartut inissisimasimasutut nalilerluni.