Akissarsiat isertuunneqarnerannut nassuiaatit assigiinngitsut

Namminersorlutik Oqartussat suliffeqarfiutaani malittarisassat ilaatigut malinneqanngillat, naak ammanerunissaq siunertaralugu Namminersorlutik Oqartussat suliarisimagaluaraat.

Sermitsiaq.AG allaaserisami saqqummereersumi ukiumoortunik nalunaarutinik 2017-imeersunik misissuisimavoq, saqqummiullugulu suliffeqarfiit sorliit pisortaasut akissarsiaannik atorfiinullu tunngasunut innuttaasunut saqqummersitsisarnersut. Allaaserisaq uani ataani atuaruk:

Siulersuisut siulittaasuisa akissutaasa ilaat aajuku:

Suliffeqarfimmi aqutsisuulluarneq

Sermitsiaq.AG-p poorskip nalaani allaaserisanik nangeqattaartunik ”Suliffeqarfimmi aqutsisuulluarnermi maleruagassat” pillugit suliaqarpoq. Maleruagassat Namminersorlutik Oqartussat suliaraat, suliffeqarfiillu aqutsisuinit ammanerunissaq anguniarneqarpoq, inuiaqatigiit akornanni oqallittoqannginnissaa anguniarlugu.

Siulersuisulli ilaasa Namminersorlutik Oqartussat innersuussutaannik malinninniarnerat ajornakusoorunarpoq.

KNI-mi siulersuisuni siulittaasoq Lars Borris Pedersen:

- KNI-mi ukiumut naatsorsuutini ilisimatitsissutigineqartartut pillugit, ukiumut naatsorsuutit inerneri pillugit inatsimmut malinnippugut. Ukiumut naatsorsuutini ilisimatitsissutigineqartut aningaaserisumit piginnittumiillu siornatigut appiunneqarsimanngillat, ilisimatitsissutigineqartullu taamaattumik naammagisimaarneqarlutik.

- Pisortaqarfimmili akissarsiat allanngorartuunerinut siunissami nassuiaateqartalersinnaavugut. KNI-p pisortaa ukiumoortumut aalajangersimasumik akissarsiaqartinneqarpoq, utoqqalinermusiassat, biilit oqarasuaallu angallattagaq sulinermi atugassaq ilanngutereerlugit. Ajunngitsorsiassamik akissarsititsisoqarsinnaavoq, tamannalu annerpaamik ukiumut akissarsiat 10 procentiusassaaq. Taannaavorlu akissarsiani allanngorartutut taaneqarsimasoq.

- KNI pisortaqarfimmi ajunngitsorsiassanik peqartitsisarpoq, soorlu eqqaaneqareersutut, suliallu pitsaanerulersinnissaannut tunngatillugum akissarsiat nikerartut ersarissarneqartalernissaat akissutitut taasinnaavara.

Kalaallit Airportsimi siulersuisuni siulittaasoq Johannus Egholm Hansen:

- Pisortat akissarsiaat ataatsimoortillugu ilisimatitsissutigisarparput. Isumaqarpugut suliffeqarfiup akissarsiaqartitsineranut suliassallu suunerinut inuiaqatigiit paasisaqarnissaannut tamanna naammattoq.

Johannus Egholm Hansen immersugassamut innersuussivoq, suliffeqarfiup aqutsilluartutut inissisimassaguni immersortariaqagaa pillugu. Immersugassaq uani takujuk.

Immersugassami takuneqarsinnaavoq Kalaallit Airportsip, akissarsiaqartitsinermut politikkimi innersuussutini qulini sisamat kisiisa malikkai.

Soraarsitsinermi piffissaliussat, sulisoqaannarnissamut tunngasut soraarnermullu tunngasut pillugit akigineqarami Johannes Egholm Hansen akivoq ”naatsorsuutini ilisimatitsissutigineqarsimasoq ippinnarsinnaasunik soraarnermut tunngasunik aaqqissuussaqanngitsoq”.

Royal Arctic Linep siulersuisuni siulittaasua Ulrik Blidorf:

- Ataatsimeersuarnissaq maajip aallaqqaataani 2019-imi pissaaq. Aalajangerneqareernikuuvoq “suliffeqarfimmi aqutsilluarnermut maleruagassat” siulersuisuni ataatsimiinnermi tullermi oqaluuserineqassasut. Siulersuisuni ataatsimiinnissaq tulleq pissaaq ataatsimeersuarnerup kingorna, Ulrik Blidorf allappoq.

Akissummi naatsumi ilanngullugu ilisimatitsissutigineqarpoq Ulrik Blidorf suliffeqarfiup 2017-imut naatsorsuutaani siulittaasutut allaqqanngitsoq, Namminersorlutilli Oqartussat innersuussutaat suliffeqarfiup malissanerai pillugit qanoq isummernini ilisimatitsissutigerusuppasinngilaa.

Sikuki Nuuk Harbourimi siulersuisuni siulittaasoq Lars Karlsson:

- Suliffeqarfiup ukiumut naatsorsuutaat ukiumut naatsorsuutit pillugit inatsimmi klasse-B-mut malinnipput. Ukiumut naatsorsuutini ilisimatitsissutigineqartartut amerlineqarnissaat siulersuisut kissaatiginngilaat. Akissarsianut politikkeqarnissaq siulersuisut siornatigut nalilereernikuuaat.

- Ukiumut naatsorsuutini siuliini qullersat atorfeqarnerannut isumaqatigiissutaanni immikkut ittunik ajunngitsorsiassaqartinneqannginnerat ilanngunneqareernikuuvoq. Qullersat “tapisiaqarnermi soraarnerussutisiaqalernissamut aaqqissuussami” ilaanngillat. Ilisimatitsissutigisinnaavara suliffeqarfiup qullersani soraarsissinnaammagit qaammatit 12-it piffisalerlugit, pisortarli soraarsitsisinnaalluni qaammatit tallimat sioqqutsilluni nalunaarnermigut. Qullersanut atugassarititaasunut ilaapput soraarnerusutisiassat, biileqartitaaneq, ukiumut ataasiarluni akiliutsilluni sulinngiffeqarnermi angalasinnaaneq attaveqatigiinnermullu aningaasartuutit matussuserneqarneri.

- Siulersuisut isumaqarput ukiumut naatsorsuutini nittartakkamilu ilisimatitsissutigineqartut naammaginartuusut inuiaqatigiinnullu ammasuunermik naammassinnittuusut. Talittarfiup suliarineqarnera maanna naammassimmat suliffeqarfik nutaamik ingerlatsisussanngorpoq, taamaammat suliffeqarfiup siunissami ilusissaa ineriartornissaalu oqaluuserineqarput. Tamanna isumaqarpoq imaassinnaasoq ukiumut naatsorsuutini paasissutissat amerlineqassasut, Lars Karlsson ilisimatitsivoq.

Sermitsiaq.AG-p suliffeqarfiit arfinillit misissuiffigai, taakkununnga Sikuki Nuuk Harbour ilaavoq, taannaavorlu paasissutissaatikinnerpaaq. Qullersat ataatsimoorlutik akissarsiaat ilisimatitsissutigineqarsimanngillat.

Royal Greenlandimi siulersuisuni siulittaasoq Niels Coninck-Smith:

- Suliffeqarfik børsimut ilaasutut allattorsimasuummat GPDR-ip malittarisassaanut (EU-mi paasissutissat illersugaanerannut malittarisassat maajimi 2018-imi atulersinneqartut, aaqq.) ilaanngilagut, taamaammat ukiumut naatsorsuutini killilersugaanerunata. Nittartakkatsinnili ilisimatitsinerusinnaavugut, suliarlu taanna ingerlavoq. Ammasuunerunissaq kissaatigaarput, Niels Coninck-Smith allappoq.

Akissut eqqumiiginarsinnaavoq, Sermitsiaq.AG-mmi siulersuisuni siulittaasoq ukiumi 2017-imi naatsorsuutit pillugit paasiniaavigaa, piffissamilu tassani GPDR-ip malittarisassai suli atulersimanngillat.