Akissarsiat ineqarnermullu akiliutit eqqarsaatinit nutaanit naapeqatigiissinneqassapput
SIK-p Nuummi immikkoortortaqarfia inissiat pitsaasut, peqqinnartut, sulisartumit akilerneqarsinnaasut, pillugit isumasioqatigiissitsilerpoq.
Akissarsiat minnerpaaffissaanni kisitsisinit pingasunit aamma ineqarnermut akiliutini kisitsimmit taatsimit takutinneqarpoq, inoqutigiippassuarni aningaasartuutissatut missingersuutini akissarsiat ineqarnermullu aningaasartuutit ataqatigiissinneqarnissaa ajornakusoortinneqartoq.
Sulisartoq ilinniarsimanngitsoq SIK malillugu akissarsiat minnerpaaffissaannik akissarsiaqartoq nalunaaquttap-akunneranut 100,47 koruuninik – imaluunniit qaammammut 17.411,45 koruuninik akissarsisarpoq. Suliaqarfimmi sulisartoq SIK malillugu akissarsiat minnerpaaffissaannik akissarsiaqartoq nalunaaquttap-akunneranut 108,89 koruuninik – imaluunniit qaammammut 18.870,63 koruuninik akissarsisarpoq. Sulisartoq ilinniarsimasoq SIK malillugu akissarsiat minnerpaaffissaannik akissarsiaqartoq nalunaaquttap-akunneranut 119,08 koruuninik – imaluunniit qaammammut 20.636,56 koruuninik akissarsisarpoq.
Inissiat nutaanerpaat, Nuummi ukiap ingerlanerani iserterfigineqarnissamut piareertussat, tassaapput kommunip inissiaatileqatigiiffiata Iserip Qinngutsinni Pinguaqqami inissiaatai 48-t. Sanaartorneq 100 millioner koruuninik akeqarsimavoq, ineqarnermullu akiliutit ukiumut kvadratmeterimut ataatsimut 1.100 koruunit missaanniissapput – assersuutigalugu inissiaq pingasunik initalik 83 kvadratmeterinik angissusilik ineqarnermut akiliutini qaammammut 7.670,00 koruuninik akeqassaaq + innaallagissamik, imermik kiassarnermillu atuineq.
Sulisartoq akissarsiaminit akileraarutinik akiliisarpoq, inuttut ilanngaatit akileraarutillu procentii apeqqutaatillugit, kisiannili ineqarnermut tapiissutinik pissarsisinnaalluni, isertitat ilaqutariillu angissusaat apeqqutaatillugit. (Takuuk Paasisat). Sulisartorpassuarnut ineqarnermut aningaasartuutit illumik aqutsinermi missingersuutini annertungaatsiartorsuarmik ilaasarput.
Ineqarneq inuunerissuunissamut matuersaataavoq
Nuummi Sulinermik Inussutissarsiuteqartut Peqatigiiffiat, NSIP, SIK-p Nuummi immikkoortortaqarfigaa, 1.050-inik ilaasortaqarluni nunatsinni illoqarfiit pingaarnersaanni sulisartut peqatigiiffiisa annersarisaat. 2021-mi ukiakkut ataatsimiinnermi ilaasortanit inuunerissuunissamut, suliffeqarnerup, ilaquttat sunngiffiullu ataqatigiiffigisaannut, aporfissat annerpaartaat oqaluuserineqarpoq. Akissut ersarippoq:
Inissiat – imaluunniit iluamik oqaatigalugu inissianik pitsaasunik, peqqinnartunik, sulisartunit akilerneqarsinnaasumik ineqarnermut akiliutitaqartunik, amigaateqarneq.
– Sulisartoqativut pisortat inissiaataanni initaarnissamut ukiuni 15-ini utaqqisariaqartarput, kiisamilu initaaraangamik, ineqarnermut akiliuteqartussanngortarlutik aningaasaqarnermik tatineqarfigisaannik, NSIP-p siulittaasua Ujoorsi Therkildsen Sermitsiamut oqarpoq.
NSIP arfininngornermi septembarip 24-ani inissiat, Nuummi sulisartorpassuarnut sammitinneqartut, pillugu ulloq naallugu ataatsimeersuartitsissaaq. Sanaartornermit, aningaaseriveqarnermit, Danmarkimi Islandimilu inissiaatileqatigiiffinnit, kommunimit aamma Namminersorlutik Oqartussanit oqalugiartussat saqqummiussissapput, ataatsimeersuarnermut peqataasut suliniutissat tigussaasut oqaluuseriniarlugit eqimattakkuutaarlutik katersuutinnginnerini.
– Sanaartornermit ilaasortatsinnut sammitinneqartumit inissiat pitsaasut, peqqinnartut, qulakkeerneqaannassanngillat, aammali ilaasortatsinnut suliffissat praktikkerfissallu qulakkeerneqassallutik, Ujoorsi Therkildsen oqarpoq.
Ataatsimeersuaq Nuummi inissaqarniarnermuinneq tunngassuteqassaaq.
– Nuummi akissarsiat sinerissamit qaffasinnerupput, tamatumali akerlianik sanaartornermi akit qaffasinnerullutik utaqqisullu amerlanerullutik. Ajorluinnartumillu pisoqartarpoq, ilaasortavut inissianik attartortitsisartunut namminersortunut qaammammut 13-15.000 koruuninik ineqarnermut akiliuteqarfigineqartartunik pinngitsaalineqarlutik inissarsiortariaqaleraangata, Ujoorsi Therkildsen oqarpoq.
Avataanit isumassarsiorneq
Nuummi pingasunik inissiaatileqatigiiffeqarpoq: Kommuneqarfik Sermersuumi Iserit aamma Namminersorlutik Oqartussani INI aamma Illuut.
Inissiaatileqatigiiffiit pingasut tamarmik initaarnissamut ukiorpassuarnik sivisussusilimmik utaqqisoqartarput.
Periarfissaq ataatsimeersuarnermi oqaluuserineqartussaq tassaavoq inissiaatileqatigiiffimmik suli allamik pilersitsinissaq.
Periarfissami tassani Danmark Islandilu isumassarsiorfigineqarsimapput, taakkunanimi Kalaallit Nunaattullu inissianik pitsaasunik, peqqinnartunik, sulisartut akissarsiaannut naleqqussarneqarsimasunik ineqarnermut akiliutitalinnik pisariaqartitsisoqarpoq. Danmarkimit tikissaaq sanaartornermut pisortaq Anders Damm, Arbejdernes Andels Boligforeningimeersoq, naalisarlugu AAB, taannalu 1912-imi pilersinneqarsimavoq inuinnut inissianik iluanaarutitaqanngitsunik pilersitsinissamik anguniagaqarluni.
AAB ullumikkut inissianik attartortittakkanik 20.000-inik attartortitsarpoq Københavnimi eqqaanilu immikkoortortaqarfinnut 106-inut agguataarneqarsimasunik.
Islandimit tikissaaq sulisartut inissiaatileqatigiiffiannik Bjargimik pilersitsinissamik suliniuteqarsimasoq, sulisartut kattuffiannik peqatigiiffilerisoq Gylfi Arnbjørnsson. Islandimi inissiat attartortittakkat siulliit juunimi 2019-imi iserterfigineqarnissaminnut piareersimapput, aamma Bjarg Reykjavik kommunelu ukioq manna inissiat 905-it Islandimi illoqarfiit pingaarnersaanni sanaartorfissanut 17-inut agguataarneqarsimasut sananeqarnissaannik siunnerfeqaqatigiinnermik atsioqatigiissuteqarput.
Aningaasalersuinissaq inissinneqassaaq
Sanaartornermik suliaqartut piginnaasaat neqerooruteqarnermilu akigititaat aningaasalersuisussat peqatigalugit sulisartunut inissianik sanaartornissamut aalajangiisuusumik inissisimaffeqarput, ataatsimeersuarnermilu Nuummi sanaartornermik suliaqartunit, Grønlandsbankenimit, Banknordikimit aamma soraarnerussutisiassanut aningaasaateqarfimmit SISA-mit saqqummiussisoqassaaq.
Kommunip inissiaatileqatigiiffia Iserit, Nuummi inissianik 100-nik ukiumut sanaartortarnissamik suliassinneqarsimasoq, inissialiortiternerup sioqqutingaatsiarluni pilersaarusiorneqartarneranik misilittagaqarluarpoq. Nuummi kvadratmeterimut aki 25.000 koruunit qaffasinnerilluunniit nalinginnaasuupput, kisianni inissiaatileqatigiiffik sanaartortartut suliffeqarfiannut EMJ/Atconimut sinaakkutitut isumaqatigiissummik ukiuni sisamani atuuttussamik isumaqatigiissuteqarsimavoq, taamaalillunilu kvadratmeterimut akigitinneqartut 18.000 koruuninut appartinneqarsimallutik.
Aningaasalersuinissamut pilersaarutaaqqaartuni Danmarkimi soraarnerussutisiassanut aningaasaateqarfik PensionDanmark 65 procentinik aningaasaliissuteqassalluni, SISA 25 procentinik aningaasaliissuteqassalluni inissiaatileqatigiiffillu Iserit 10 procentinik aningaasaliissuteqassalluni peqataapput.
Politikkikkulli eqqissiviilliorneq, Namminersorlutik Oqartussat Sermersuumi periuserineqartumut immikkuullarissumut aporfissaliinerata malitsigisaanik pilersimasoq, pissutaalluni, soraarnerussutisiassanut aningaasaateqarfiit taakkua marluk suliniummit tunuarsimapput. Tamatumunnga taarsiullugu Iserit Pinguaqqami sanaartornermut nammineq aningaasaatini atorlugit aningaasalersuivoq, kisianni Pinguaqqami inissiami pingasunik initalimmi ineqarnermut akiliutissatut assersuutigineqartunit sulisartorpassuit unammillerneqarsimapput.
Suleriaqqinnissaq
NSIP-mit nassuerutigineqarpoq, nukiit pitsaasut tamarmik suliassaq aaqqiissuteqarfiginiarlugu suleqatigiittariaqartut, immikkoortortaqarfillu Nuummi sulisartunut inissiat pillugit isumasioqatigiinnissamut atatillugu suleqatigiissitamik pilersitsisimavoq:
Ujoorsi Therkildsen, NSIP-ip siulittaasua, John Jakobsen, Grønlandsbanken, Jesper Hansen, Banknordik, Bo Eriksen, Sulisitsisut Nuummi immikkoortortaqarfiata siulittaasua, Jens Paulsen inatsilerinermut tunngasuni piginnaasalinnut sinniisutut, Arnaq Johansen, NSIP-ip siulersuisuinut ilaasortaq, Avaaraq S. Olsen, Kommuneqarfik Sermersuumi borgmesteri, Uju Petersen, Kommuneqarfik Sermersuumi kommunalbestyrelsimut ilaasortaq, aamma Torben Kortegaard, kommunip inissiaatileqatigiiffia Iserit A/S.
Suleqatigiissitap siunnersuutit ataatsimeersuarnermi saqqummiunneqartut suliareqqissavai.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
