Skip to main content

Akissarsianik qaffaaneq SIK-p siulittaasuata nalorninartinnerulerpaa

SIK-p Namminersorlutillu Oqartussat akissarsianut tunngatillugu marlunngornermi unnukkut isumaqatigiissutaat pillugu, SIK-p siulittaasua Jess G. Berthelsen isumalluarnarpallaalaartumik saqqummiivoq.

SIK-p siulittaasuata isumaqatigiissut saqqummiuteqqaaramiuk ilaasortat tamakkerlutik akunnermut 2,15 koruuninik qaffaavigineqassasutut nipeqatippaa. Siornatigut 0,92 koruuninik qaffaasoqarnissaanik saqqummiussisoqarsimavoq. 

Tiimimulli 2,15 koruunit qaffaassutaasussat tamanut atuunnavianngillat, kisitsimmi agguaqatigiisitsinermit taaneqarpoq.

Isumaqatigiissutit assigiinngitsut 16-it

Isumaqatiginninniarnermi 117.505.321 koruunit isumaqatiginninniutigineqarput, taakkulu isumaqatigiissutinut assigiinngitsunut 16-inut, katillugit 6.757-inik ilaasortaqartunut agguataarneqassapput.

Nunatsinni sulisartut inuussutissarsiuteqartut kattuffianni siulittaasup, Jess G. Berthelsenip, ilisimatitsissutigisinnaanngilaa isumaqatigiissutit assigiinngitsut akissarsiaat qanoq qaffaavigineqassanersut.

- Akissat 2 koruunimik qaffanneqarsinnaapput, imaluunniit 2 koruunit 5 ørellu, imaluunniit minnermik. Aatsaat taakku inissititilerpagut, Jess G. Berthelsen oqarpoq taamaasillunilu ilaasortat sinnerlugit isumaqatiginninniarnerup inernerigalua pillugu nalorninartorsiortitsilerluni. Ilaasortat ilaat, nunatsinni napparsimmavinni portørit, suliap ingerlanera pillugu sapaatit akunneri arlalialuit qaangiummata naammaginnikkunnaarlutik akunnerni sisamani suliaminnik unitsitsigallarput.

Isumaqatigiissutip takissusaa

Namminersorlutik Oqartussat ukiunik arlalinnik takissuseqartumik isumaqatigiissusiorumanerusarput, taamaasillutik tunngavinnik patajaannerusunik pilersitsissagamik. Isumaqatigiissutip takissusaa apeqqutaatillugu Namminersorlutik Oqartussat akunnermut akissarsianik annikinnerutitsisinnaapput.

SIK-lli isumaqatigiissutai nalinginnaasumik ukiuni pingasuni atuuttaraluartut, maanna ukiunut sisamanut atuutsinneqartussanngorlugu isumaqatigiissutigineqarpoq. Tamassuma kingunerisaanik isumaqatigiissutigineqartoq kusanarnerusutut isikkoqarsinnaavoq, pingaartumik 0,92 koruuninut sanilliukkaanni.

LÆS OGSÅ: SIK isumaqatigiissuteqarpoq

Akissarsiat pillugit isumaqatiginninniarnerup aallartinnginnerani SIK ilaasortami peqatigiiffiinut piumasaqaatinik piumasimavoq, piumasaqaatillug katillugit 158-it pisimavai. Piumasaqaatigineqartut tamakkerlugit naammassineqassappata, tamanna 7 milliardit koruuninik naleqassagaluartoq, SIK-p siulittaasua Jess G. Berthelsen ilisimatitsivoq.

Akissarsiallu qaffanneqarnerannut isumaqatigiissutit maanna isumaqatigiissutinut assigiinngitsunut inissititernissaannut suliaq aallartippoq. Suliaq naammasseriarpat ilaasortanut taasissutigineqartussanngorlugit nassiunneqassapput.

Jess G. Berthelsen ilisimatitsivoq, ilaasortat utaqqilaartariaqassasut, isumaqatigiissutit qaqugu naammassineqassanersut piffissalerneqarsimanngimmat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER