Akinut ilisimaneqannginneq RAL-imut unammillernartoq
Niuertarfiutillit RAL-ip assartuusseqatigiinnermut pilersaarutai periarfissagissaartippaat, akinulli nalornineq unammillernartuuvoq annertooq
Kalaallit Nunaanni niuertarfiutillit Royal Arctic Linep assartuussinissamut pilersaarutaanut nutaanut, sapaatip-akunneri tamaasa Danmarkimit Europamilu umiarsualivinnit containerersorfiusunut, ilaatigut Reykjavikimit Kalaallit Nunaannut tikittoqartalernissaanut isumalluartorujussuupput. Akilli ajornartorsiortitsipput.
Sermitsiaq allappoq.
– Island pilersuisutut soqutiginaateqarpoq – suleqatigiinnerlu isumalluarfigisorujussuuarput, Pisiffiup, Islandimi Bónus-kædemit Akiki pisiniarfinnut nutaanut nioqqutissanik akikitsunik eqqussuinermik aallartitseqqammersup, pisortaa Per Steen Larsen oqarpoq.
– Danmarkimit nioqqutissanik timmisartukkoortunik pinnata, Islandimit nioqqutissanik umiarsuakkoortunik pisinnaalerutta, tamanna ingammik nutaanik nioqqutissaqarniarnermut annertuumik sunniuteqassaaq. Maannali akinik assartuinermilu pissutsit qanoq innerannik Royal Arctic Linemit paasissutissanik sukumiisunik pinissarput suli utaqqivarput, taamaammallu aalajangersumik oqaatigisaqarnissamut suli siusippallaarpoq. Uagut sumut niuernerput apeqqutaatinnagu nioqqutissat pisisartunut akikinnerulernissaat Pisiffimmut pingaarnerpaajuvoq, allatut oqaatigalugu, assartuinermi akit appartariaqarput.
Aalborg uiarterineruvoq
Taamatuttaaq Morten Jørgen Heilmann, Pikkori Sport Nuuk, periarfissanut nutaanut annertuumik soqutiginnippoq.
– Nuannaarutigisorujussuuara. Aalborgimi Grønlandshavni uiarterinertutut isigiuaannarnikuuara. RAL-ip neriorsuineratut Islandikkut aqqutit Kalaallit Nunaannut nioqqutissanik eqqussukkanut akikinnerulersitsillutillu sukkanerulersitsisinnaanerat isumalluarfigisorujussuuarput.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: