Akinik allannguineq

Akinik qaffaanikkut tapit apparaluartut malunnaataarutsinneqarput

Naak Royal Arctic Linep uuliamut tapeq aamma nunat allat aningaasaasa nikerartarnerannut iluarsiissutit marsip aallaqqataaniit appartinniaraluarai, allannguineq assartuinermut akit qaffannerasigut malugineqarsinnaassanngilaq

Assartuinermut akit 1. martsimit aallartittumik qaffassapput, kisianni ulloq taanna uuliamut tapeq aamma nunat allat aningaasaasa nikerartarnerannut iluarsiissutit appartinneqassapput.

Taama Royal Arctic Line nalunaaruteqarpoq.

Royal Arctic Linemit nalunaarutigineqartut naapertorlugit Royal Arctic Linep assartuinermut akigitinneqartut iluarsineqarnissaannut qinnuteqaataa, ingerlatsiviup aningaasaqarneranik patajaallisaanissamik umiarsuarnut nutaanut pisariaqartunut aningaasaliissuteqarnermut pissuteqartoq Naalakkersuisut sisamanngornermi oqaluuseraat, taamaalillutillu akigitinneqartunik aamma tapimik iluarsiissuteqarnerit akuersissutigalugit.

Atuaruk: RAL: Taamaattumik assartuineq akitsussaaq

Tamannalu isumaqarpoq Royal Arctic Linep assartuinermut akigititai marsip aallaqqaataanit iluarsineqartussanngormata. Iluarsiissutigineqartussaq Royal Arctic Linep paasissutissiinera naapertorlugu assartuinermut akinik 4,8 procentimik qaffaaneruvoq, taamaattorli aamma uuliamut tapeq aamma nunat allat aningaasaasa nikerartarneranut iluarsiissut katillugit 5 procentimik, tassa 4 procentimiit -1 procentimut appartinneqassaaq.

- Taamaattumik akinik iluarsiissuteqarneq ataatsimut assartuinermi akigitinneqartunut sunniuteqassanngilaq, Royal Arctic Line ilisimatitsivoq.

Powered by Labrador CMS