Akinik assigiisitsineq naatsorsuutigisamit akisunerujussuusoq
Akinik assigiisitsilerneq pissutigalugu Nukissiorfiit 2018-imi isertitatigut 153 millionit koruuninik kinguariarpoq. Tamanna ilimagisami annertuneruvoq.
Sammineqartoq pillugu allaaserisamik nutaamik saqqummertoqarnikuunera maluginiaruk
Politikerit akinik assigiissitsineq januaarip aallaqqaataani 2018-imi atuutilersissallugu aalajangermata Nukissiorfiit marlunnik taarsiiffigineqarput: kiffartuussinermut isumaqatigiissutikkut akiliineq aamma Namminersorlutik Oqartussanut taarsigassarsianut sivisuumik akilersorneqartunut erniat appartinneqarnerisigut.
Ikiorsiissut naammanngitsoq
Kisianni Namminersorlutik Oqartussanit taarsiissutigineqartup isertitat ikileriarnerisa matussusernissaanut naammanngerujussuarpoq, Nukissiorfiit naatsorsuutaannut kukkunersiuinermi saqqummiunneqaqqammersumi tamanna atuarneqarsinnaavoq.
- Taamaalilluni amigartoortoqassaaq, tamatumalu malitsigissavaa nalikilliliinerit angusat assigiitsissinnaassanngilaat. Taamaalilluni sanaartornermit aningaasaatinik appartitsisoqassaaq, kukkunersiunermi tamanna naqissuserneqarpoq.
1,6 milliardit koruuninik appartitsineq
Nukissiorfiup ingerlatseqatigiiffiup appartitsinerit kiffartuussinermut isumaqatigiissummit 72 millionit koruunit ilanngutereerlugit 1,6 milliardit koruuninut naatsorsorpaat.
Nukissiorfiit ukiumut taarsigassarsiarisartagai 60 millionit koruuninut sinaakkuteqarput, ingerlatseqatigiiffiup ingerlatsinermigut akiliisinnaassuseqarnera peqatigitillugu ukiumut aningaasaqarnikkut 150 millionit koruuninik aningaasaleeqqinnissamut periarfissaqartarpoq.
2018-imi angusat 4,36 millionit koruuninik sinneqartoorfiupput, ukiup siuliani 13 millionit koruuninik amigartooruteqarluni.
- Nukissiorfiit kiassarnermut akit uuliap akiata apparnerata kinguneranik MWh-imut 30 koruuninik septembarip aallaqqaataani 2018-imi appartippaa. 2019-imut innaallagiamut, imermut aamma kiassarnermut akit attanneqarnissaat naatsorsuutigaat, pisortat nalunaarutaanni tamanna atuarneqarsinnaavoq, tassanilu aamma sumiiffinni akinik appartitsiffiunerpaasuni innaallagiamik imermillu atuineq taasarialimmik qaffariartoqarsimanngitsoq oqaatigineqarpoq.
Nuummi Ilulissanilu atuisoqarnerulertoq
Ilulissani aamma Nuummi ingerlatseqatigiiffiup atuisoqalernerunera malugaa, kisianni suliaqartoqarneruneranut aamma ineriartortoqarneranut tamanna tutsinneqarpoq, illoqarfinni taakkunani akinik assigiisitsineq annikitsuinnarmik appartinneqartinneqarnikuummat.