Akiliissut nutaaq suli piareerneqanngitsoq

Ilanngaassivik, Akileraartarnermut Aqutsisoqarfiup ineriartortissallugu ingerlatissallugulu
akisussaaffigisaa, juulip aallaqqaataani 2021-mi atulersinneqartussaagaluarpoq.
Atulersinneqarnissaali 2021-p naaneranut kinguartinneqarpoq, 2021-mut Aningaasanut
Inatsimmi tamanna atuarneqarsinnaavoq, kisianni atulersinneqarumaarnersoq,
naalakkersuisoqatigiinnit nutaanit partiimillu tapertaannit taamaatinneqaannassanersoq
apeqqutaavoq.

Ilanngaassivik ”suli ineriartortinneqartoq”, Aningaasaqarnermut Aqutsisoqarfik
Sermitsiaq.AG-mut ilisimatitsivoq.

- Immikkoortup siulliup ineriartortinneqarnerata naammassinissaa, Akileraartarnermut
Aqutsisoqarfiup ineriartortitsilluni suliniutaasa ilarpassuinit utaqqisinneqarpoq,
aningaasaqarnermut aqutsissut nutaaq, soraarnerussutisiaqalernissamut
aaqqissuussinermut peqataasussaatitaaneq, sulinermut ilanngaat, Digitalimik
Allagarsisarneq, Covid-19-imut ikiorsiissutit allallu ilanngullugit, taakku tamarmik
aqutsisoqarfiup ineriartortitsinermut atorfilittaanik ukiumi kingullermi atuititsipput,
Akileraartarnermut Aqutsisoqarfik taama nassuiaavoq.

Nunap karsianut akiligassat

Pisortat innuttaasut akiligassaannik akiliisitsisarnerup nutarsarneqarnissaa
pilersaarutaagaluarpoq, tamatumalu peqatigisaanik siunissami akiligassanik
ajornartorsiortarnissat pitsaaliorneqarnissaat. Innuttaasullu pisortanut akiligassaqartut
akiliissummik atuilersinneqarniaraluarlutik, taamaalilluni innuttaasut Nunatta Karsianut
akiligassaat 800 millionit koruunit sinneqartut ilaat pissarsiarinnaaniassammagit.
Niuerfimmi it-mut piareersimasumik peqanngilaq, akiliisitsissullu naqqaniit
ineriartortinneqartariaqarpoq, nunatsinnilu inatsisinut aqutsinermullu
tulluarsarneqassalluni, “tamannalu sulisunut attuumassuteqartunut sulisitsisunillu,
kommuninut allanullu suleqatigiinnermut annertuumik piumasaqaateqartitsissalluni”,
Akileraartarnermut Aqutsisoqarfimmit ilisimatitsissutigineqarpoq.
Akileraartarnermut Aqutsisoqarfik suliassamut siorna suliniummut pisortamik
atorfinitsitsivoq, kisianni pineqartup piffissani tamaat it-mi suliassanut suliarisarialinnut
atorsimavaa.

168.600 kr. atorneqartut

- Suliarinnittussarsiornissamut tunngavissamik piumasaqaatit erseqqissarnerinut
suliaqarnermut atatillugu avataanit suliarinnittartumut 168.600 koruunit

atorneqarnikuupput, Akileraartarnermut Aqutsisoqarfik, 2020-mi allaffissornikkut
aallarniutaasumik suliaqarnermut 2 millionit koruuninik aamma ukioq manna 5 millionit
koruuninik immikkoortitsisimasoq, taama ilisimatitsivoq.
Akiliissummik atuutilersitsinissamut inatsit akuerineqarmat, Akileraartarnermut
Aqutsisoqarfik, akiliisitsissutip ineriartortinneqarnera 30 millionit koruunit missaannik
akeqarnissaa naliliivoq, akiliissutillu ingerlanneqarnera ukiumut 7,5 aamma 9,5 millionit
koruunit akornanni akeqassallluni. Naatsorsuinermi iluanaarutissat kisianni annertupput,
akiliissutip ataatsimut isigalugu pisortat aningaasaqarnerannik ukiumut 30 millionit
koruuninik pitsanngoriaateqarnissaannik siulittuisoqarmat.

Amerlanerussuteqaqqarneq

Ukiumut 30 millionit koruuninik iluanaaruteqartoqartussaagaluartoq, Ilanngaassivik pillugu
inatsit amerlanerussuteqaqqartunit novembarip 20-anni 2019-imi akuerineqarpoq. Maanna
partiit naalakkersuisoqatigiit IA aamma Naleraq kiisalu Atassut akerliullutik taasipput.