Akiliisitsiniartarneq allanngortinneqartoq
Akiliisitsiniartarneq kommuninut tunniunneqassaaq. Vittus Qujaukitsup qaammatit marluk matuma siornatigut aningaasaqarnermut naalakkersuisuunermini apeqquteqaat aallaavigalugu oqallitsitsinissamut akissuteqaatiginiakkamini tamanna sakkortuumik mianersoqqutigingaluarpaa.
IA Nalerarlu aalajangersimapput, pisortanut akiitsorineqartut 850 millioner koruuniusut kommuninit akilersinniarneqarneqassasut. Aalajangiineq Aningaasaqarnermut Naalakkersuisoqarfimmi atorfilittanit nuannarineqarpallaarnaviarunanngilaq, taakkumi februaarip aallartinnerani apeqquteqaat allaavigalugu oqalitsitsinissamut Vittus Qujaukitsup akissuteqaatissaa oqaasertalersorsimavaat, oqallitsitsinissarli qinersisoqarnissaanik nalunaaruteqartoqarnera pissutigalugu ingerlanneqanngitsoorpoq.
Atassummit siunnersuutigineqartoq
Aqqalu C. Jerimiassenip Atassummeersup tamanna Ukiuunerani ataatsimiinnermi oqaluuserisassanngortissimavaa, oqallitsitsinissamullu imatut tunngavilersuisimalluni:
- Akiliisitsiniartarnermut oqartussaaffik Kommuniniit oqartussaaffigineqaqqilertuuppat inuit aamma sumiiffimmik orniguffissaqalissapput, akiliisitsiniartarfiullu inuit pissarsiariuminartinnerussagaluarpaat, ikiorlugit, sumiiffimminni inuttullu atugaat paasillugu, tulluartumillu akiliisinnaanissaannut periarfissillugit, Atassummi siulittaasoq eqiterussisimanerup iluatsinneqarsimannginneranik isumaqartoq taamanikkut taamatut tunngavilersuivoq.
Itigartinneqartoq
Vittus Qujaukitsup akissuteqaammini Atassutip siulittaasuata siunnersuutaa arlalinnik tunngavilersuilluni itigartitsissutigaa.
- Siullertut suliassap tigunissaanut innuttaasunut qanilaarnissaq kisimi piumasaqaataanngilaq. Suliassaqarfikkut inatsitigullu suliassamut piginnaasaqarnissaq aamma atorfissaqartinneqarpoq. Piginnaanngorsaaneq sulisullu tigummiinnarnissaat nuna tamakkerlugu allaat ajornartorsiutaavoq. Unammillernartoq tamanna annikinnerulernavianngilaq kommunit tallimat namminerisamik allaffissornikkut immikkoortortaqarfiliortitsissappata. Akiliisitsiniartarnerup pitsaasuunissaa qulakkeerneqassappat suliatigullu illersorneqarsinnaassappat, taava atorfissaqartinneqarpoq suliamut tunngasumut avatangiisimik paarlaassueqatigiiffiusumik ilinniartitsiffiusumillu pilersitsititsinissaq, tamannalu allaffissornikkut inuttakitsuni ajornakusoortorujussuusinnaalluni, Vittus Qujaukitsoq akissuteqaammini taamatut erseqqissaassuteqarsimavoq.
- Assigiimmik sullissinissaq inatsisitigut tunngaveqartumik malitassaavoq, taassuma erseqqissaassutigaa.
Vittusa Qujaukitsip tunngavilersuutai allat tassaapput, kommunit aningaasaqarnerat nanertorneqalissasoq aningaasat annaasaqaatit naleerutsinneqartarneranni kiisalu allaffissornerup annertunerulerneratigut. Aamma oqartussat ataatsimoortumik qarasaasiatigut atortorissaarutaat qitiusumit aqunneqarunnaassappat it-mut aningaasartuuteqarnerusoqalissasoq.
Akisussaaffiup uteqattartinneqarnera
- Akiitsunik akiliisitsiniartarnermut akisussaaffik Namminersorlutik Oqartussat kommunillu akornanni uteqattaartussanngorlugu inissinneqassanngilaq. Ullumikkut akiliisitsiniartarnermik suliaqartut innuttaasut inuunerminni inissisimaffii nalunngereerpaat. Sulinermi eqqissisimatinneqarnissartik ujartorpaat. Akiliisitsiniartarnermi oqartussat ataatsimoortumik akiliisitsiniartarneranni timitaliinissaq ujartorpaat, taannalu aqqutigalugu innuttaasut kommunillu akornanni attaveqarnermut tunngaviliinissaa ujartorlugu, akissuteqaammi Inatsisartuni oqaluuserineqanngitsoortumi allassimavoq.
Aningaasaqarnermut naalakkersuisuusimasoq taamatut tunngavilersuuteqaraluartoq, Naalakkersuisunut siulittaasunngortussap Múte B. Egedep naalakkersuisooqatigiinnissamut isumaqatigiissummi ukiuni tulliuttuni sisamani atuuttussami pineqartoq atuutiinnassasoq oqaatigaa.
- Innuttaasunut akiitsulinnut najukkamit siunnersorneqartarneq nukittorsasavarput. Tamannami angusaqarfiulluartartoq paasinarsereerpoq, Múte B. Egede Sermitsiaq.AG-mut oqarpoq.