Akiligassat millionit pillugit Sermersuumit suliaq Lollandip suliassanngorteqqippaa
Lolland Kommunemi borgmesterip eqqartuussisuuneqarfimmit eqqartuussut naleqqutinngilluinnartutut oqaatigaa, taamaattumillu kommunip kalaallimut innuttaasumut eqqarsartaatsimigut innarluutilimmut akiligassaq pillugu saqitsaanneq eqqartuussiviit qullersaannut suliareqqitassanngortinniarpaa.
Sapaatip akunnerani kingullermi Kommuneqarfik Sermersooq Danmarkimi Vestre Landsretimi Lolland Kommunimut eqqartuussinermi ajugaavoq. Lolland Kommunep suliap Eqqartuussiviit qullersaannut suliassanngorteqqinniarlugu, tusagassiuutinut nalunaarummi nalunaaruteqarpoq.
Suliami kalaallimut eqqarsartaatsimigut innarluutilimmut, Danmarkimi Kofoedsmindemi katsorsarneqartussatut pineqaatissinneqarsimasumut akiligassamut 5 millionit koruunit missaanniittunut Lolland akiliisussanngorlugu eqqartuunneqarpoq.
Innuttaasoq paaqqutarineqarnermini nutaamik pinerluuteqarsimavoq, taamaattumillu Lolland Kommunip maanna innuttaasoq akiliuttariaqaraa, Kommuneqarfik Sermersooq naliliivoq, Sermersoorlu tassani ilalerneqarpoq.
Lolland Kommunemi borgmesterip eqqartuussut naleqqutinnginnerarpaa:
- Naleqqutinngilaq
- Tunngavitoqaq pitsaasoq tassaavoq, nammineq innuttaasorisanut isumaginnittarneq. Kalaallit Nunaat aamma taamaaliortariaqaraluarpoq, kalaallit innuttaasut sumiinnersut apeqqutaatinnagu, borgmesteri Holger Schou Rasmussen, nangillunilu:
- Danskit kommunii aningaasartuutinik suliassanillu amerlasuunik, toqqagarinngisatsinnik imaluunniit aqussinnaanngisatsinnik, Kalaallit Nunaat naleqquttunik paaqqinnittarfinnik naleqquttunik neqerooruteqannginnera pissutigiinnarlugu tunineqartarnerat tulluanngilaq. Tamatuma sakkortuumik kinguneranik Lolland Kommunimi atugarissaarnermut sipaarniarnerusariaqalerpugut.
Kofoedsminde nunap immikkoortuani ingerlanneqarpoq, kommunimit pinnani, Lolland Kommunellu Kalaallit Nunaannit innuttaasunit arlalinnit millionikkaanik akiligassaqaqqissinnaanini ernumassutigisorujussuuaa. Taamaammat kommunip suliaq ajorsarfigeqqissappagu, politikkikkut aaqqiissuteqartoqarnissaanik borgmesteri kissaateqarpoq:
Kofoedsmindemut sumiiffimmi kommunitut Eqqartuussisuuneqarfiup aalajangiinera tunuliaqutigalugu, kalaallit innuttaasut eqqarsartaatsimikkut innarluutillit inunnut uloriaanaatilinnik pinerluuteqarsimasut, Lolland Kommunimit akisussaaffigineqalernerat aningaasartuutigineqarnerallu inatsisitigut aalajangerneqartoq takuarput. Tamanna siunertaasinnaanngilaq – Folketingip tamanna paasisinnaassagaa naatsorsuutigineqarsinnaavoq, Holger Schou Rasmussen oqarpoq.
Aningaasat tamakkiisut pissarsiarinngikkaat
Eqqartuussutip nalilersoqqissaarnissaa pisariaqartinneqartoq, Kommuneqarfik Sermersuup tallimanngormat ilisimatitsissutigaa, kommuni suliamut tunngatillugu aningaasat tamarmiusut tunniunneqarsimanngimmata.
2021-mi marsimi suliami Sermersuup aamma Lolland Kommunip akornanni 8.620.675,30 koruunit missaanniittut akiligassat pineqarput. Lolland eqqartuussisuuneqarfimmit 5,2 millionit koruuninik akiliisussanngortinneqarpoq.