angallernermi nalornineq

Akiligassat milliardit mittarfiit nalorninartorsiortippaat

Kangerlussuarmi mittarfiup nunap qeriuaannartup ajoqusiinerata iluarsinissaat akisusinnaangaarmata, mittarfiit tikinneqakkajunnerit tallinissaat akiliersinnaaneruvoq

Inatsisartut ukiaanerani ataatsimiinneranni ullumi oqalliffimmi siullermi Randi Vestergaard Evaldsen (D) tupaallannartumik oqariartuuteqarpoq.

Paasinarsivoq atlantiku qulaallugu timmisartunut mittarfinnik Nuummi aamma Ilulissani sanaartortoqarnissaa anguniarlugu Demokraatit sulissuteqarniartut, tamanna partiip siullermik oqariartuutigisimasaanit allaaneruvoq.

Kangerlussuarmi mittarfeqarfiup iluarsartuuteqqinnissaa aamma siunissamut qulakkeernissaa, ilaatigut asfaltimi permafrostimik ajoqusernerit iluarsartuunnissaat 2 milliardit koruuninik naleqassasoq, angallannermut naalakkersuisoqarfimmit kisitsisit takutikkaat kukkunersiuinermut ataatsimiititaliap siulittaasuata tikkuartorpaa.

Suna akilersinnaanerua?
- Apeqqutitsialaavorli iluarsartuussineq akisoorsuaq akilersinnaanerunersoq, imaluunniit mittarfik allamut inissillugu akilersinnaanerussanersoq, Randi Vestergaard Evaldsen oqarpoq.

- Demokraatit apeqqummut kingullermut isumaqaaterupput, tassanilu isumaqarpugut Nuummi aamma Ilulissani takinerusunik mittarfissuaqalernissaat akilersinnaanerussasoq.

Atuaruk: Taamaammat mittarfissualioqqinnissanut akissaqanngilaq

Demokraatip Inatsisartut ataatsimiittarfianni ilanngussaa, aggustip naanerani angallannermut naalakkersuisoqarfiup Jens-Erik Kirkegaardimit apeqqummut akissummit tigulaagaavoq.

Iluarsartuusseqqinneq ilimagisamit akisunerussaaq
Akissumi tamanit takuneqarsinnaasumi Knud Kristiansenip (A) akissutaani allaqqavoq, Kangerlussuarmi mittarfiup asfaltitaata aamma illutaasa siunissamut qulakkeerneqarnissaat ilimagisamit pingasoriaatingajammik akeqassasoq, tassa 725 millionit koruuninik:

- Kangerlussuarmi mittarfiup nunanit allanit angallannermut pingaarnertut mittarfiuinnassappat, ilanngullugu 2 milliardit koruunit missaaniittunik aningaasaleeqqittoqarnissaa naatsorsuutigineqartariaqarpoq, Knud Kristiansen (A) akissummini allappoq, tassani aamma ilannguppaa taakku kisitsisit nutaat mittarfinnik mississuinerni suliarineqartuni ilanngunneqanngitsut.

Randi Vestergaard Evaldsenip Inatsisartuni ullumi oqalugiarnermini ilaanngullugu oqaatigaa, mittarrfeqarfinnut nunanit allanit aningaasaliisussanik suleqateqarnissaq takorloorlugu. Tamannalu sammisaq qaammatini tulliuttuni malinnaavigissallugu soqutiginarpoq.

Atassut piginneqatigiinnermut akerliusut
Angallannermut naalakkersuisup Knud Kristiansenip (A) aasaanerani mittarfinnik oqallittoqarnerani naalakkersuisooqatigiinnut politikkikkut sinaakkutassamik avataanit aningaasaliisoqarnissaanut aaqqiineq mittarfimmik piginneqataassut avinneqarneranik kinguneqassappat ajortuusoq inissiilluni iluatsikkaluarpaa.

Naak naalakkersuisooqatigiit isumaqatigiissutaanni allaqagaluartoq, avataanit aningaasaliinerit siumukaataassasut.

Knud Kristiansenip oqariartuuteqarnera kingusinnerusukkut Ole Dorphimit (S) aamma Lars-Emil Johansenimit sakkortuumik isornartorsiorneqarpoq.

Atuaruk: Ole Dorph: Naalakkersuisut takorluugaqanngilla

Powered by Labrador CMS