Akiligassarujussuit arlallit ulorianartorsiortitsipput

Mittarfiliortiternermi immikkut aningaasartuutissat amerlanerpaajupput. Unammilligassat allat inuiaqatigiit aningaasaqarnerat ulorianartorsiortippaat, apeqqutillu amerligaluttuinnarput. Akileraarutit killeqanngitsumik qaffakkiartornissaat naalakkersuisoqatigiit kissaatiginngilaat, taamatut akipput.

Mittarfiliortiterneq piffissaq sivikitsoq isigalugu aningaasatigut tatineqarpoq, naatsorsuutigineqarporli aningaasaliissutit utertinneqarumaartut. Akerlianik unammilligassat allat pissutigalugit atorfillit ulappipput.

Amerlasuut aasaanerani sulinngiffeqangajalerput, Naalakkersuisulli ullut tamakkiallugit ulapittariaqassapput, ajornartorsiutit takkussuuttut iliuuseqarfiginiarlugit Ukiakkut Ataatsimiinnermi aningaasaqarnermut pilersaarummik saqqummiussisinnaassagunik. Aviisi AG taama allappoq.

Kingullermik mittarfiliortiterneq akisunerujussuanngorsinnaasoq saqqummmiunneqarpoq. 900 millioner koruuninik.

Inuiaqatigiilli aningaasaqarneranni anginerujussuarnik ulorianartorsiortitsisoqarpoq, tamakkualu pissutigalugit politikerit aningaasaqarniarneq erloqinartoq sammisariaqarpaat, politikkikkut naleqartitat oqitsut, manna tikillugu ulluni 100-nngulersuni naalakkersuisoqatigiit atuussimaneranni sammineqarsimasut, pinnagit.

Aningaasaqarnermut ulorianartorsiortitsisinnaasut ilaat namminersorlutik oqartussat missingersuutaannut naatsorsuutaannullu inatsisissatut siunnersuummi, tusarniaassutigineqaqqammersumi, saqqummiunneqarput.

- Pisortat aningaasaqarnerisa tatineqarnerat ukiuni aggersuni annertuumik annertusissaaq, Naalakkersuisut allapput.

- Pisortat kiffartuussissutaannik atorfissaqartitsineq naassaanngingajappoq, nangilluni allassimasoqarpoq.

Kalaallit Nunaata utoqqartai

Piffissaq ungasinnerusoq isigalugu pissutaasoq immikkut ittoq aningaasaqarniarnermik tatisissaaq.

- Naatsorsuutigineqartariaqarpoq piffissami 2021-miit 2036-mut innuttaasut, innuttaasunit sulisinnaasunit 17-iniit 66-inut ukiulinnit tamakkiisumik ilaannakortumilluunniit pilersorneqartussat, amerleriarujussuassasut, missingersuummut inatsimmut oqaaseqaatini allassimasoqarpoq.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS