Aleqap atornerluinera
Akiligassaqanngilanga
Martha Lund Olsen: Kukkusoqarpoq
Naalakkersuisuni ilaasortaasimasoq oqarpoq Namminersorlutik Oqartussanut akiligassani 1.455 koruunit akilersimallugit. Atorfilittat akornanni kukkusoqarsimasoq oqaatigaa.
- Allaffissornikkut tamakkiisuunngitsumik sullinneqanerup kinguneranik pisortanut akiligassalittut 'nivinngagaavunga'. Aningaasanik Namminersorlutik Oqartussaniit pisassaqarpunga – akiligassanniit amerlanerusunik.
Ilaqutariinnermut Inatsisinillu atuutitsinermut Naalakkersuisuusimasoq Martha Lund Olsen AG-p kikkut naalakkersuisuusimasut nunatta karsianit atornerluisimanerannit paasiniaanerannut akissuteqarpoq.
Aviisi paasissutissanik Namminersorlutik Oqartussani qinnuteqaammini paasiniarpaa naalakkersuisuusimasut allat aamma kikkut aningaasanik atornerluisimanersut.
Kukkunersuinermut suliaqartartut Deloittep apeqqutai assigalugit aviisi Namminersorlutik Oqartussanut apeqquteqarpoq. Deloittep misissuinerisa inerneri Inatsisartunut qinersisoqareerpat aatsaat saqqummiunneqassapput, paasissutissallu Grønlandsbankenimiitinneqarput.
Qinersisartunit politikkerinillu paasissutissat qinersisoqannginnerani saqqummiunneqarnissaat piumasarineqartareerpoq.
AG ilaatigut allappoq Aleqa Hammond saniatigut politikkerit pingasut aningaasanik atornerluisimasut.
- Akiligassakka – katillugit 1.455 kr-usut – tassaapput Københavnimiit Rønnemut billetsimut akiliutigineqarsimasut. Bornholmimut ataatsimiigiartussaasimagaluarpunga, ataatsiminnissalli taamaatinneqarnera ima kingusitsigisukkut pisimavoq, billetsi pisiarineqareersoq akilerneqareersorlu
aatsaat taamaatinneqarsimalluni – atorunnaarsinnissaanut kingoqqusippallaalereersoq, Martha Lund Olsen tusagassiutinut nalunaaruteqarpoq, nangillunilu:
- Taamaattumik angalaneq uanga nammineq angalaneriinnarpara, ataatsimiinnissaagaluara kingusippallaamik taamaatinneqarmat.
- Illuatungaatigulli aamma namminersorlutik oqartussaniit aningaasanik pisassaqarpunga, taamaalillungalu Namminersorlutik Oqartussanut akiitsoqarsimananga, akerlianilli aningaasanik pissaqarlunga.
Aviisi AG saqqummersoq ataani pisiarineqarsinnaavoq: