Akilersilluni peqquserluttarneq: Akiliiluni peqquserlutsitsisimanerit pillugit suliat arlaqartut

Piffissami 2014-imiit 2018-imut Kalaallit Nunaanni pisortatut oqartussaasumik akiliilluni peqquserlutsitseriarsimanerit pillugit suliat sisamaasimapput kiisalu pisortatut oqartussap atornerluisimaneri pillugit suliat tallimaasimallutik, misissuisimanermi annertuumi Inatsisartut suliakkiutigisimasaanni saqqummiunneqaqqammersumilu tamanna atuarneqarsinnaavoq.

Kalaallit Nunaanni akilersilluni peqquserluttarnerup akiorniarneqarnera pillugu nalunaarusiaq siulleq 2012-imi saqqummiunneaqarpoq. Taamanikkut pisortanik isumaqatigiissuteqarniarluni imaluunniit kiffartuussinissamik isumaqatigiissuteqarniarluni akiliilluni peqquserlutsitseriartoqartarnera Kalaallit Nunaanni ajornartorsiutaasutut imatut isikkoqarsimanngilaq.

Misissuisimanermi nutaami 2020-mi novembarip qaammataani naammassineqartumi, piffissaq 2014-imiit 2018-imut tunngavigalugu pissutsit allanngorsimasut takutinneqarpoq.

Peqquserluuteqartoqarsimaneranik nalunaarutit amerlisimasut

- Piffissami pineqartumi peqquserluuteqartoqarsimaneranik nalunaarutigineqarsimasut 81-iniit 203-nut amerlisimapput. Aningaasatigut peqquserluuteqarsimanerit allatigullu peqquserluuteqarsimanerit pillugit nalunaarutigineqarsimasut suli ikittunnguungaluarput, taamaakkaluartoq taakku pillugit suliarineqarsimasut 22-niit 27-nut amerleriarsimallutik, nalunaarusiami tamanna atuarneqarsinnaavoq, 2012-imi misissuisimanermut tamanna sanilliukkaanni akiliilluni peqquserlutsitsisimanerit amerleriarsimasut aamma nalunaarusiami atuarneqarsinnaavoq.

Nalunaarusiami allassimavoq, sanasutut ingerlatseqatigiiffiit pingasut 2012-imi pisortanut sumaqatigiissutissanik annertuunik sisamanik aaqqissuisimasutut pineqaatissinneqarsimasut.

- Niuernikkut isumaqatigiissuteqareertarneq taamatut ittoq Kalaallit Nunaanni takuneqaqqissimanngilaq, nalunaarusiami tamanna erseqqissaatigineqarlunilu inuiaqatigiinnit akiliilluni peqquserluuteqartoqarsinnaaneranik akiuiniarluni politikkerinut arlalinnik inassuteqaateqartoqarpoq.

Killissarititat

Nordic Consulting Group A/S-imili nalunaarusiamik suliarinnittut isumaqarput, ”Kalaallit Nunaanni peqquserluuteqartarneq ikinngutinik kiffartuussisarnerup suliamullu attuumassuteqarpallaartarnerup killissaasa akornanniinnerusartut aamma tunissuteqarnissamut piginnaatitaanerup piginnaatitaannginnerullu killissaasa akornanniinnerusartut”.

Nalunaarusiami 60-it angungajallugit quppernilimmi, Kalaallit Nunaanni akilersilluni peqquserluuteqartoqarsinnaanera minnerpaaffianiitinniarlugu inassuteqaatit arlallit saqqummiunneqartut akornanni uku immikkut saqqummiunneqarput:

Inatsisartut immikkut ilaatitsinnginnisamik akuersissutitaqarpallaartunik inatsisiliornaveersaartariaqarput

Inatsisartut Kukkunersiuinermut Ataatsimiititaliaat nukittorsarneqassaaq

Whistleblowerimik aaqqissuussasq pitsanngorsagaq aamma arlaannaannulluunniit attuumassuteqanngitsoq pilersinneqassaaq

- Peqatigitillugu tusatsiagarpassuit pasitsaassisarnerpassuillu kiisalu akilersilluni peqquserluuteqartarnerup siammasissumk akiorniarneqarnerata takutippaat, aaqqissuussaanerusumik pineqartup suliarineqarnissaa pisariaqartinneqartoq, nalunaarusiamik suliaqartut allapput, ilanngullugulu allallutik:

Pinaveersaartitsisoqatigiit

- Taamaammat inassutigineqarpoq, nunat tamalaat akilersilluni peqquserluuteqartarnerup akiorniarneqarneranni isumaqatigiissutaannut Kalaallit Nunaat ilanngutissasoq aamma akilersilluni peqquserluuteqartarnerup akiorneqarnissaanut periusissiussasoq.

Inatsisartuni politikkerit aamma siunnersorneqarput, piffissaq ungasinnerusoq eqqarsaatigalugu ”akilersilluni peqquserluuteqartarnerup akiorneqarnissaanut inatsimmik akuersissuteqarnissamik aamma Kalaallit Nunaanni akilersilluni peqquserluuteqarneq assigisaanilluunniit peqquserluuteqartarneq pinaveersaartinniarlugu, paasissutissiissutigisarniarlugu nakkutiginiarlugulu pinaveersaartitsisoqatigiinnik pilersitsinissamik eqqarsaateqaqullugit”.

Aamma atuaruk: Allaatigisaq: Akilersilluni peqquserluttarneq imatut pinngitsoortissinnaavarput

Powered by Labrador CMS