Akileraarutitigut isertitat qaffakkiartoqqilersut
Inummut, tunisinermi soraarnerussutisiassanullu akileraarutit martsip apriilli qaammataani apparujussuarsimapput, isertitalli ilaat inuiaqatigiinnut pingaaruteqartut maanna qaffaqqissimapput, siorna piffissap taamaalineranut sanilliullugit qaffasinnerujussuullutik.
Inummut, tunisinermit soraarnerussutisianullu akileraarutitigut isertitat martsip qaammataan 2,49 procentimik appariariarsimapput, tassa kommunit isertitaasa 8,3 millioner koruuninik ikileriarsimanerisa nalingannik. Apriilip qaammataa kommuninut akisunerpaasimavoq, tassani isertitat katillugit 8,46 procentimik ikileriarsimagamik - 27,7 millioner koruunit nalingannik.
Qaammatit marluk Nuummi coronamik tunillatsittoqarsimanera pissutigalugu illoqarfik matoqqatinneqamat kommunimut sunniuteqarsimaqaaq, tamanna Sermitsiaq.AG-p Akileraartarnermut Aqutsisoqarfiup allagaataani takusimasaaani atuarneqarsinnaavoq.
Takuneqarsinnaavormi, maajip juunillu qaammataanni akileraarutitigut isertitat ukiup siulianut sanilliullugu 12,73 aamma 15,67 procentimik qaffassimasut, tassa siorna qaammatinut taakkununnga pineqartunut sanilliullugu 92 millioner koruuninik amerleriarsimallutik.
Pissutsit arlallit pissutaasut
Ajunngitsumik ingerlasoqarnerata nuannaarutigineqarpallaalinnginnerani Akileraartarnermut Aqutsisoqarfimmi pisortap Kim Neumann Nielsenip erseqqissaatigaa, isertitatut taaneqartut "Namminersorlutik Oqartussat kommunillu isertitassaraluannut Covid-19-imit sunnerneqarsimasunut taamaallaat matussutissaasut".
Taassuma oqaatigaa, susassaqarfiit allat toqqaannartumik toqqaannanngitsumilluunniit aningaasaqarnikkut eqqugaanissaat naatsorsuutigineqartoq:
Umiarsuarnut takornariartaatinut ilaasunut akitsuutit ukioq manna isertinneqassanngillat. Umiarsuit takornariartitsisartut tamatumunnga tunngitillugu qularnartupilussuarmik inissisimapput.
Ingerlatseqatigiiffiit akileraarutaat ukiumik ataatsimik kingumut naatsorsorneqartarput. Tassa Covid-19-ip ingerlatseqatigiiffiit akileraarutaannut sunniutissai aatsaat aappaagu takuneqarsinnaanngussapput.
Nunarsuarmi aalisakkanut akigititat ajornartorsiornerup nalaani appangaatsiarsimasut, Nunatta Karsiata isumalluutinit isertitassaanut sunniuteqassapput.
Aamma ilimanarluinnarpoq, coronap ajornartorsiortitsinera ingerlatseqatigiiffiit anginerit, soorlu Air Greenlandip GrønlandsBankenillu iluanaarutiminnik akiliuteqarnissaannut sunniuteqarnissaa. Ukioq manna aappaagulu. Tassa iluanaarutit akileraarutaasigut ikinnerusunik isertitaqartoqassaaq.
Kommunit ataasiakkaat isertitaat tamarmiusut tulliuttumi takuneqarsinnaapput, qaammatinut aamma inummut, tunisinermit soraarnerussutisiallu akileraarutaannut agguataarlugit:
