Akileraarutitigut appartitsinerup uuliasioqatigiiffiit aggertissavai
Periusissiamik nutaamik uuliasioqatigiiffiit nunatsinnukarteqqinneqassapput
Akileraarutip appasinnerusup uuliasiorneq aallarteqqissavaa.
AG taama allaaserisaqarpoq.
Kalaallit Nunaata imartaanni uuliasiorneq ukiorpaalussuarni uninngavoq.
Maanna periusissiamik uuliasioqatigiiffiit mikisut akunnattumillu angissusillit soqutiginnilersinniarneqassapput.
Soqutiginnilersitsisussaq tassaavoq akileraarut ullumikkumit appasinnerusoq.
Akileraarutit tamarmiusut uuliasioqatigiiffinnit Namminersorlutik Oqartussanut akilerneqartartussat maannakkorpiaq 52 procentiupput.
Tamanna aarlerinaatinut uuliasioqatigiiffiit aqqusaagaannut sanilliullugu annertuallaartoq oqaatigineqarpoq. Periusissiami nammagassat qanoq iliornikkut oqilisaavigineqarsinnaanerannut assigiinngitsunik siunnersuuteqarpoq.
Akileraarutit 35 procentinut appartinneqarnissaat siunnersutigineqarpoq, imaluunniit taakkua akornannut.
Royaltynik kinguartitsineq
Periusissiami inassutigineqarpoq, uuliasioqatigiiffiit aatsaat royaltymik akiliuteqartassasut sinneqartooruteqalerunik – ullumikkutuunngitsoq, kaaviiaartitanit royaltymik sinneqartoorutinillu royaltymik akiliuteqartussaallutik. Tamatuma kingunerissavaa sinneqartuunnginnerminni akileraarutit katillugit 32,2 procentit akilinnginnissaat, sinneqartoornermilu 45,1 procent akilertassallugu.
Naalakkersuisoqarfik 2018-ip qiteqqunneraniit uuliaqarneranik gasseqarneranillu misissueqqissaarnissamut iluaqutiginninnissamullu akuersissuteqarfigineqarnissamut qinnuteqaatinik nutaanik sisamanik tigusaqarsimavoq. Taamaalilluni maannakkorpiaq kisermaassinissamut akuersissutit atuuttu arfiniliupput.
Namminersorlutik Oqartussat uuliasiortut qanoq ilillutik pilerisutsilerniarneraat pillugu AG-mi saqqummertumi kingullermi atuarsinnaavat: