Akileraaruteqanngitsumik sulinngiffeqarluni angalaneq: Akeqanngitsumik akunnittarfimmiigit
Aasaq manna sulinngiffeqarninni akiliunneqarlutit angalasussaaguit, taava akunnitarfinni unnuinitit aamma akilersissinnaavatit. Nunamili angalanermi kiisalu akunnittarfimmiinnermi aningaasat amerlassusiisa, suliffimmit Københavnimut utimullu angalanerup billetip akianit amerlanerussanngillat.
Naalakkersuisut qitiusumik kattuffiit, sulinngiffeqanissamut aningaasaateqarfinnik aqutsisut arlallit, 2020-mi akunnittarfinni unnuinerit, akileraaruteqanngitsumik sulinngiffeqarluni angalanermut atatillugu aaqqissuussamut ilanngunneqarnissaanik isumaqatigissuteqarfigisimavaat. Namminersorlutik Oqartussat tusagassiorfinnut nalunaaruteqarnermi ilisimatitsipput.
Sulinngiffearnissamut aningaasaateqarfiit ukunaniittut:
AK
ASG
Kigut
IMAK
NPK
PK/PPK
SIK
SSK
TP
Nalinginnaasumik akileraaruteqanngitsumik sulinngiffeqarluni angalaneq suliffimmit Københavnimut – imaluunniit nunatsinni angalaffissamut angalalluni taamaallaat atortaraluarpoq. Bilitsilli akiata Københavnimut utimullu akia qaangissanngillaa. Aaqqissuussinermi maannamut ajkunnittarfinni unnuinerit aamma ilaatinneqalerput, aningaasartuutit katillugit suliffimmit Københavnimut utimullu billetip akia qaanginngippagu, Namminersorlutik Oqartussat ilisimatitsipput.
- Taamatut siunnersuuteqarnermi pisariaqarsimavoq ilaasortat pitsaanerpaamik feriarnissaat qulakkeerniarlugu. Ilaasortat amerlasuut Danmarkimut feriarnissamik eqqasuuteqarsimapput Corona peqqutigalugu. Aningaasat sinneruttut Kalaallit Nunaanni akileraaruteqanngitsumik hotelimiinnissamut ilaasortavut feriarnissamut periarfissaat pitsanngorpavut, ataatsikkullu Kalaallit Nunaanni takornariaqarneq ajornartorsiornermi ikorfartorlugu , kattuffiit isumaqatigiissuteqarsimasut ataatsimoorlutik oqaaseqaateqarput.
Nunami angalag itsi
Malittarisassanik taamatut allannguigallarnermi, ilaasortat aningaasa Københavnimut angalanermi atugassaraluatik, Kalaallit Nunaata iluani angalanissamut nuussinnaavaat. Tassa angalaneq akikinneruppat, akunnittarfimmiinnermi aningaasartuutit tamaasa ilaannaaluunniit aningaasaateqarfimmit matussuserneqarsinnaapput.
- Tulluusimaarpunga kattuffivut Naalakkersuisullu ataatsimoorsinnaammata nunatta aningaasaqarnikkut ajornartorsiornerani. Isumaqatigiissutikkut takornariaqarnermut tapersersuinerput ersersipparput. Isumaqatigiissut nunatsinni pinneqisumi takornariaqaleqqinnissaanut ikorfartuivoq. Periarfissaq taanna amerlasuut sineriatsinni angeqisumi atorluassagaat neriuutigaara. Kattuffiit suleqatigiilluarnerannut qujarusuppunga , Aningaasaqarnermut Naalakkersuisoq Vittus Qujaukitsoq oqarpoq.
Isumaqatigiissut ukiup naalerneranut atuuppoq, tassa 31. december 2020, takornariaqarnermik ingerlataqartut piffissami tassani eqqugaanerussasut isumaqatigiissuteqartut naatsorsuutigimmassuk .