akileraartarnermut suliaq
Akileraartartoq Akileraartarnermut Aqutsisoqarfimmit aningaasanik tigooraaffigineqartoq
Akileraartartoq nalorneqisoq, David Løvstrøm, qaammatini 21-ni Akileraartarnermut Aqutsisoqarfimmiik akineqarneq ajornini qatsutiivillugu Sermitsiaq.AG saaffigaa.
Aasiammiu David Løvstrømip, taama kusanaatsigisumik sullinneqarnera paasissagutsigut, piffissaq suliffeqarfeeqqamik pilersitsiniarluni – ukiumut 12.00-15.000 koruunit missiliorlugit isertitsissutigisartagaani – aalajangerneranut utertittariaqassavarput.
Kukkusumik atorfinititsineq
Suliffeqarfiup isertitassagatitai, Akileraartarnermut Aqutsisoqarfiup piumasarisimavai, kukkunikkullu ukiumut 400.000 koruuninik isertitaqartartussatut naqinneqarsimalluni.
Tamatuma kinguneraa, David Løvstrøm, ulluinnarni Qaasuitsup Kommuniani Annaassiniartartuni upalungaarsimasuutitanut pisortatut tullersortaasoq, qaammatit tamarluinnaasa akissarsiaanit ilanngaavigineqartarnera.
November 2015-miit j2017-imi juulip naanerata tugaanut Akileraartarnermut Aqutsisoqarfiup naliginnaasumik akileraarutit qaavisigut 140.683 koruunit ilanngaatigisimavai.
Saaffiginninnerpassuit
Kukkusoqarsinnaavoq, taamaammat Akileraartarnermut Aqutsisoqarfimmut arlaleriarluni saaffiginnissuteqarsimangaluarpoq. Oqarasuaatikkullu saaffiginnikkaangat, mailimik nassitsissasoq qinnuigineqartarsimavoq, arlaleriarlunilu taama iliortarsimavoq.
Tamatigorluinnaq mailimik akissuteqarfigineqartarsimavoq, tassani Akileraartarnermut Aqutsisoqarfiup maili tigunerartarsimavaa suliarlu saaffiginneqqikkuni atugassaanik normulerneqartarsimalluni.
Akileraartarnermut Aqutsisoqarfimmullu saaffiginnissuteqarnerisa tamarluinnaasa taama pisoqartarpoq.
Taanna Ombudsmandimut maalaaruteqarsimavoq, tassanngaanniillu David Løvstrøm qinnuigineqarsimavoq Akileraartarnermut Aqutsisoqarfiup inerniliinissaa utaqqisariaqaraa!
Taassuma kukkunersiuisartut Deloitte akuliutsissimavai, taakku Akileraartarnermut Aqutsisoqarfimmut saaffiginnissuteqarnissaanik ikiorsimavaat.
Sunaluunniit ikiuutaasimanngitsoq
Akileraartarnermut Aqutsisoqarfiup nipaannera David Løvstrømimut nalorninartorsiortitsivoq.
Sermitsiaq.AG-p Akileraartarnermut Aqutsisoqarfik attaveqarfigisimavaa pisortamillu issuarneqarusunngitsumik oqaloqateqarsimalluni. Ima nalunaaruteqarpoq:
- Inuit ataasiakkaanut suliat pillugit oqaaseqarsinnaanngilanga. Taanna innersuutiinnarsinnaavara uagutsinnut maileqqullugu uunga tax@nanoq.gl.
David Løvstrømip kimut maalaaruteqarsinnaanera apeqqutigineqarmat, akissutigineqarpoq:
- Ombudsmandi.
Ombudsmandimut maalaaruteqaqqinneq
- Ombudsmandimut maalaaruteqaqqissaanga, David Løvstrøm paasissutissiivoq.
- Suliakkiussama qisuariarfigineqartannginnera qatsulluinnarpara akuersaarsinnaajunnaarlugulu. Akissarsianniit tigusillattaartunik suleqatigiipiluttoqarnerluni?, taanna aperivoq.