Akileraartarnermut siunnersuut isornartorsiorneqartoq: Kalaallit suliffeqarfiisa unammillersinnaasusaat ajornerulersissavaa
Ingerlatseqatigiiffiit atorunnaarsinneqarneranni iluanaarutit akileraaruserneqartalerpata, Kalaallit Nunaanni suliffeqarfiit ilisimasaqarluartut ingerlanneqarnissaannut tunngaviit ajorseriassasut, pisortaanermit oqaatigineqarpoq. Naalakkersuisulli inatsisissatut siunnersuummut isornartorsiut isumaqatiginngilaat, aalajangiussimallugulu oqaatigalugu akileraartarnermut inatsimmi amigaataasut aaqqiissuteqarfigineqarnissaat pineqartoq.
Naalakkersuisunit siunnersuutigineqarsimavoq, ingerlatseqatigiiffiit atorunnaarsinneqarneranni iluanaarutit akileraaruserneqartalissasut. Naalakkersuisunit oqaatigineqarpoq, matumani inatsimmi amigaataasut aaqqiiffiginiarneqartut, siunnersuulli Rambøll Grønlandimi pisortaanerup Inooraq Brandtip eqqarsarnartoqartippaa.
Pisortaaneq isumaqarpoq, inatsit nunami maani suliffeqarfinnut atugassarititaasunik ajornerulersitsissasoq, tamatumalu kinguneranik suliffeqarfiit unammillersinnaasusaat ajornerulersinneqassasoq, tassa ingerlatseqatigiiffiit Kalaallit Nunaanni najugaqanngitsut nunamulli matumunnga kiffartuussisartut ajornerusumik inissisimalertussaammata:
- Nunami najuunnissarput najukkanilu ineriartortitsinissarput anguniagaraarput, ingeniøritulli kiffartuussisartut sullisorisarpavut, taakkulu Kalaallit Nunaanni najugaqanngitsut suliffeqarfittut unammillertarlutigit.
- Inatsissatut siunnersuut atuutsinneqalissappat, Kalaallit Nunaanni suliffeqarfiit ilisimaqarluartut ineriartortinneqarnissaannut tunngaviit annikillisinneqassapput, Inooraq Brandt Sermitsiaq.AG-mut oqarpoq, nangillunilu:
Naalakkersuisut inatsimmi amigaataasutut isigigaat
- Nunami maani suliffeqarfiit akileraartinneqarnerusalissappata, nunani allani suliffeqarfinnut nunami allamiit ajornanngitsunnguamik kiffartuussisinnaasunut unammillersinnaanerput ajornerulersinneqassaaq.
Aningaasaqarnermut Naalakkersuisup Naaja H. Nathanielsenip (IA) isornartorsiuisoqaraluartoq aalajangiussimallugu oqaatigtaa, inatsimmi amigaataasut aaqqiiffigineqarnissaat pineqartoq:
- Atorunnaarsitsinermi aktiaatit piginneqatigiiffiilluunniit nammineerluni matuneqartarput. Pigisatut nalillit, soorlu biilit, pisattat tunisassiornermilu atortut tuniniarneqartarput, akiligassaqarfiillu tamarmik akilerneqartarlutik. Sinneqartoorutitut sinnerussimasut piginnittunut agguaanneqartarput.
- Sinneqartoorutigineqartut ingerlatseqatigiiffinnut akileraarummik akileraaruserneqartarput, akileraarut taanna maannakkorpiaq 25 procentiuvoq. Aningaasat pineqartut aningaasarsiatut piginnittulluunniit iluanaarutissaatut tunniunneqartuuppata, 42-44 procentimik akileraartinneqassangaluarput. Taamatut inissittoqartarnera akileraartarnermut inatsimmi amigaataasutut Naalakkersuisunit isigineqarpoq, tamannalu allanngortikkusunneqarluni, Naalakkersuisoq allakkatigut akissuteqarluni taamatut oqarpoq.
Pisortaaneq: Qaavatigut akileraarusiiniarneq tupinnarpoq
Rambøll Grønlandimi pisortaaneq Naalakkersuisut isumaannut isumaqataanngilaq.
Apeqqut: Naalakkersuisut ingerlatseqatigiiffimmik atorunnaarsitsinermi iluanarutit akileraaruserneqartarnissaannik kissaateqarput, poælitikkikkut taamatut isumaqartoqarnera naapertuutinngila?
- Sinneqartoorutivut soorunami akileraaruserneqartussaapput, tupigusuutigineqarsinnaavorli ukiorpassuarni sinneqartoorutigineqartartut immikkut akileraarusersorneqariasaalerneqarniarnerat, Inooraq Brandt oqarpoq.
Inooraq Brandtip oqaatigaa, ingeniøritut kiffartuussisarnermi ilisimasanik allanik tunngaveqarluni kiffartuussisarnerit allat assigalugit killeqarfiit akimorlugit unammillertoqartartoq, Naalakkersuisullu taamaammat suliffeqarfiit ilisimaqarluartut Kalaallit Nunaanni ineriartortinneqarnissaannut tunngaviit annertusarneqarnissaat ukkatarisariaqaraat. Pisortaaneq naapertorlugu, suliffeqarfiit sapinngisamik amerlanerpaat Kalaallit Nunaanniiginnartinneqarnissaat nalitoorujussuuvoq:
Naalakkersuisoq: Tunngavilersuutigineqartoq naammanngilaq
Kaaviiaartitatta annersaat ineqarnermut akiliutissamut, suliffeqarfiutitta ingerlanneqarnissaanut allanit kiffartuunneqarnissamik pisiaqarnermut aamma sulisutta aningaasarsiassaannut, najukkami pisiniarfinni niuerniarnermut atorneqartarlutillu inissamik pisiaqarnermut akileraartarnermullu atorneqartartunut akiliutigineqartarput, Inooraq Brandt oqarpoq.
Naaja H. Nathanielsenilli akileraartarnermut inatsisissap nutaap suliffeqarfiit unammillersinnaanerannut ajoqusiinissanik oqaaseqarneq isumaqatiginngilaa:
- Ingerlatseqatigiiffiup unammillersinnaasusaanut ajoqusiissasoq tunngavilersuutigineqarnera naammanngilaq, siunissamimi qaquungaluarnersoq matusisoqarlunilu tunisaqartoqanngitsoortoqarsinnaavoq. Tunngavilersuutigineqartoq ikkappallaaqaaq, Naalakkersuisut inatsimmi amigaataasumik asuli atuiinnartoqartitsinnaanerannut, Nathanielsen allappoq.
Naalakkersuisoq: Inissialiortiternermi atorneqarsinnaavoq
Naalakkersuisut inatsisissatut siunnersuuteqarnermut atatillugu aningaasat akileraarutitigut qanoq annertutigisut isertinneqartassanersaut ilisimatitsissutigisimanngilaat.
Naaja H. Nathanielsenili akileraartarnermut inatsimmi amigaataastu qanoq atorneqarsinnaanerannut assersuusiorpoq:
- Assersuutigalugu takorloorneqarsinnaavoq, ingerlatseqatigiiffik inissianik sanaartortitseriarluni inissianik nammineq pigisassatut tuniniasoq. Inissiaq kingulleq tunineqarpat ingerlatseqatigiiffik atorunnaarsinneqarluni. Taamatut pisoqarnerani piginnittut 25 procentimik akileraartinneqassapput. Inatsisip atuuttup atuutsiinnarneqarnissaanut tunngavissaqanngilagut, Naaja H. Nathanielsen oqarpoq.