KL

DK

Akileraariaaseq aatsitassarsioqatigiiffiit soqutiginninnerannik akimmisaartitsisoq

Nunarsuarmi sumiiffippassuarni saffiugassanik aatsitassaqarpoq, Kalaallit Nunaalluasseqanngitsooqqajanngilaq, aatsitassanik immikkut ilisimasalik oqarpoq, oqartussallu kaammattorlugit atugassarititaasunik aatsitassarsioqatigiiffiit Kalaallit Nunaanni naapittagaannik misissuinissaannik.

– Nunamut taama inukitsigisumut aatsitassarsiornermik ingerlatsinermik annertuumik misilittagaqartorsuunngitsumut avataanit sulisussarsiornissaq avaqquminaatsuuvoq. Tamanna ullumikkut akileraariaatsimut naapertuutinngilaq, Barrick Gold Corporationimi pisortaq, James Fergusson, oqarpoq. Taanna Kalaallit Nunaat nunatut aatsitassarsiorfittut pilerinartuunersoq oqalugiaatigiartorlugu Future Greenlandimut qaaqqusaasimavoq.
redaktion

Aatsitassarsiornermik suliffeqarfimmut pingaarnerpaat soorunami tassaapput aatsitassat, tassa imaappoq ujarassiornissamut periarfissat. Tamatumali saniatigut nunami politikikkut patajaatsuuneq akileraartarnikkut pissutsit, attaveqaasersuutit innaallagissamik, imermik sulisussanillu ilinniarsimasunik atuisinnaaneq pineqarput, aviisi Sermitsiaq allappoq.

Aatsitassarsiornermik suliaqarfimmit aningaasaliinerit siunissami ungasissumut sammisuusarput, taamaattumik oqartussat aatsitassarsioqatigiiffiillu akornanni suleqatigiinnerit pitsaasut patajaatsullu pilersinneqarnissaat tunngavissaasarpoq, Canadamiut ingerlatseqatigiiffianni Barrick Gold Corporationimi, nunavissuarni sisamani nunani 17-ini aatsitassarsiorfinnik ingerlataqartumi, pisortaq, James Fergusson, oqarpoq.

Taanna Future Greenlandimut qaaqquneqarsimavoq, aporfissat Kalaallit Nunaanni aatsitassarsiornermik ingerlatsisutut takusinnaasani pillugit oqaluttuariartoqqullugu.

Taannalu naapertorlugu aporfissaq pingaarutilik tassaavoq akileraariaaserput:

– Kalaallit Nunaanni ingerlatseqatigiiffiit akileraarutaat nunarpassuarnit suliffigisaraluatsinnit qaffasinnerusupput. Tamatuma saniatigut 2,5 aamma 5,5 procentit akornanni royaltiesinik akiliuteqartitsisoqartarpoq.

Taamatuttaarlu ingerlatseqatigiiffiit 40 procentit sinnerlugit iluanaaruteqassagaluarpat immikkut akileraarutinik 15 procentinik akiliuteqartoqartussaasarluni. Kingullertut taaneqartoq immikkut ajornartorsiutaavoq, piffissanimi ingerlalluarfiusuni oqartussat tigusivallaartarpata piffissani ilungersunartuni atortussiassat akii apparpata aniguiniarnissaq aatsitassarsioqatigiiffinnut ajornakusuulissaaq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

politikki inuiagatigiit
Powered by Labrador CMS