Aki: 80 millioner koruunit meeqqanut iluaqutaassapput
Siumumit folketingimi ilaasortaatitap Danmarkimi naalakkersuisut Naalakkersuisullu meeqqat atugarliortut immikkut ittumik ikioserneqarniarnerat pillugu suleqatigiinnerat qujassutigaa
Kalaallit meerartaannut atugarliortunut ikiorsiissutissatut Danmarkip 80 millioner koruuninik immikkoortitsinissaa pillugu isumaqatigiissut ippassaq unnukkut kiisami inissinneqarpoq.
Siumut folketingimi ilassortaatitaata, Aki-Matilda Høegh-Damip isumaqatigiissut nuannaarutigaa.
- Tamanna Kalaallit Nunaanni meeqqanut inuusuttunullu pingaaruteqarpoq. 80 millioner koruunit suliniutinut, pissutsinut sunniuteqartussanut pitsanngorsaasussanullu atorneqassapput, meeqqanut inuusuttunullu iluaqutaasussanngorlugit aamma inersimasunut iluaqutaasussanngorlugit, taanna oqarpoq.
Meeqqat kinguaassiuutitigut innarlerneqartarnerat imminortarnerallu akiorniarlugit Naalakkersuisut Danmarkimit ikiorserneqarnissamik piumasaqaqqullugit upernaaq tatineqarput.
- Danskit kalaallillu naalakkersuisui tamatumunnga suleqatigiissimanerat pillugu qujaffigerusuppakka. Aamma partiit allat 80 millioner koruuninik ikiorsiissuteqarnissamut tapersiinermikkut sillimatinik atuutsitsinissamut isumaqatigiissuteqaqataanerat qujaffigerusuppara, Aki-Matilda Høegh-Dam oqarpoq.
Folketingimi ilaasortaaqataa Aaja Chemnitz Larsen (IA) isumaqarpoq, Naalakkersuisut danskit ikiorsiinerat malillugu 20 millioner koruuninik tapiissuteqartariaqaraluartut.